Venezuelë, qeveri-opozitë, dhunë në parlament

Sipas tij, Nicolas Maduro ka fituar zgjedhjet me një diferencë prej 1,49%, ose prej më pak se 225 mijë votash. Shifrat e mëparshme tregonin një fitore me diferencë prej 1,8%.

Kandidati opozitar, Henrique Capriles, ka kërkuar një rinumërim të plotë, gjë që këshilli e ka refuzuar. Ndërkohë, mbështetësit dhe kundërshtarët e Maduro-s janë përplasur në parlament.

Një grup kongresmenësh opozitarë thanë se u sulmuan gjatë një seance plenare në Asamblenë Kombëtare, teksa njëri prej tyre, Julio Borges, u shfaq në televizion me dëmtime në fytyrë.

Kongresmeni tha se ata po protestonin kundër përpjekjeve për të bllokuar të drejtën e tyre për të folur, për sa kohë që nuk e njihnin Maduro-n si fitues. Përfaqësues të qeverisë thanë gjithashtu se ishin sulmuar.

Shifrat e publikuara nga Këshilli Kombëtar Elektoral (CNE), ditën e hënë, zbuluan se Capriles kishte fituar 93,13% të votave të hedhura nga jashtë vendit. Ndërkohë, kur janë numëruar 99,79% e votave, diferenca mes dy kandidatëve është ngushtuar në 1,49%.

CNE deklaroi presidentin Maduro si fitues më 15 prill, pasi ai kishte arritur atë, që ai vet e quajti si “mazhorancë të pakthyeshme”. Ai u betua më 19 prill. Capriles kërkoi një rinumërim votë për votë, por CNE tha se ishte e pamundur ligjërisht të ndodhte diçka e tillë.

Megjithatë, u pranua të zhvillohej një auditim i pjesshëm, që pritet të vazhdojë deri në qershor. Gjatë tij, rreth 56% e votave do të hetohen, pasi pjesa e mbetur prej 44%, sipas CNE, është hetuar menjëherë pas zgjedhjeve.

Të hënën, Capriles tha se Maduro kishte “vjedhur në mënyrë të paligjshme Presidencën”. Ai ka kohë deri në 6 maj për të paraqitur kërkesën e tij në Gjykatën Supreme, me anë të së cilës konteston rezultatin e zgjedhjeve. Capriles tha se nuk ka “asnjë dyshim, se kjo çështje do të përfundojë përpara ndërhyrjes së trupës ndërkombëtare”.

Top Channel