Putin: Rusia nuk po i rikthehet stalinizmit

Gjatë një fjalimi të përvitshëm përpara kombit, ku për orë të tëra Putin i përgjigjet pyetjeve të gazetarëve, presidenti tha: “Nuk shoh asnjë praktikë staliniste në veprimet e shtetit modern rus”.
”Stalini mbahet mend për kultin e personit, shkeljet masive të ligjit, raprezaljet, kampet e burgosjes dhe gjëra të tilla nuk ndodhin në Rusinë e sotme e shpresojmë që të mos ndodhin kurrë. Rusët nuk do të lejojnë kurrë që ajo kohë të rikthehet”.

”Megjithatë, kjo nuk do të thotë që nuk duhet të tregojmë disiplinë, nuk duhet të respektojmë rregullin dhe ligjin. Të gjithë qytetarët rusë janë të barabartë përpara ligjit. Askush nuk është në burg sot për shkak të pikëpamjeve të tij politike”, shtoi Putin.

I pyetur për marrëdhëniet me jashtë, Putin tha se raporti me Shtetet e Bashkuara të Amerikës është përmirësuar që prej pushtimit të Irakut, të cilin Rusia e kundërshtoi, por theksoi se disa veprime të fundit të Uashingtonit kanë rikthyer tensione “të panevojshme”, duke iu referuar një ligji që i kufizon hyrjen në SHBA 18 zyrtarëve rusë, të akuzuar për shkelje të të drejtave të njeriut.

Organizatat nderkombetare: Putin po shtyp fjalën e lirë

Deklarata e presidentit të Rusisë vjen një ditë pasi dy prej organizatave më të mirënjohuara të mbrojtjes së të drejtave të njeriut në botë, “Human Rights Watch” dhe “Amnesty International”, akuzuan Moskën për kufuzimin e dukshëm të lirive thelbësore të njeriut, që prej rikthimit të Putin në krye të shtetit një vit më parë.

Sipas këtyre dy organizatave, liria në Rusi është përkeqësuar, ndikuar edhe nga miratimi i disa ligjeve që lejojnë autoritetet të shpërndarjnë forcërisht protestat e konsideruara “të paligjshme” dhe mbylljen e organizatave joqeveritare me financim nga jashtë.

”Në vitin që prej rikthimit të Vladimir Putin në presidencë, qeveria ruse ka ndërmarrë një shtypje të paprecedent të shoqërisë civile, në historinë post-sovjetike të Rusisë”, deklaroi të mërkurën “Human Right Watch”.

”Dy ligje të reja dhe 11 amendime ligjesh kanë ndikuar në shtypjen e të drejtës së shprehjes së lirë, grumbullimit dhe manifestimit paqësor. Përballë këtyre reformave arbitrare, disidenca dhe zëri i shoqërisë së lirë po shuhet dita ditës”, protestoi me nota të ashpra “Amnesty International”.

Ndërkohë, pa u ndikuar nga këto konstatime të dy prej OJQ-ve më të rëndësishme ndërkombëtare në fushën e të drejtave civile, ditën e mërkurë rinisi gjyqi ndaj një prej kundërshtarëve kryesorë të Vladimir Putin, disidentit Alexei Navalny, i akuzuar për korrupsion dhe përvetësim të fondeve publike.

Pak ditë më parë, presidenti Putin theksoi se nuk ka ndërmend të falë as dy përfaqësueset e një grupi muzikor, “Pussy Riot”, të cilat po vuajnë dënim me burgim në disa qëndra izolimi në Siberi, për shkak se hynë në një kishë, ku kënduan me sllogane kundër Putin.

Për autoritetet ruse, një performance e tillë, që dhunoi kishën, ishte një “vepër flagrante huliganizmi”, e dënueshme me burgim pavarësisht presionit ndërkombëtar për lirimin e këngëtareve.

Top Channel