Rini artificiale

Në kohët e sotme ky shqetësim është eleminuar; të paktën për ato që guxojnë t’i qasen kirurgjisë estetike.

Xhevrie Haka është 47 vjeç. Nuk ka asnjë lidhje me botën e modës dhe televizionit. Megjithatë, veten në prag të moshës së tretë dëshiron ta shohë më të rinuar. Sot ajo do të bëjë një ndërhyrje estetike në fytyrë. Lifting.

“Duke dëgjuar, duke parë reklama nga rezultatet që kanë dhënë. Duke pasur parasysh moshë time, s’po më pëlqente vetja, thashë ta bëj”, thotë Xhevrija.

Mjekja estete Lida Hoxha, gati për t’i plotësuar dëshirën pacientes së saj, na thotë se, femrat vuajnë shumë faktin e rrudhjes dhe varjes së pjesëve të ndryshme të fytyrës në këtë moshë.

“Femrat pas të 30 i kanë më të dukshme rrudhat në qafë, pjesa inferiore e fytyrës plus mollëzat mund të bien. Lifting sugjerohet pas të 40-tave dhe tek gratë 50- vjeçare është e domosdoshme. Lifting është rigjenerim bazal i shtresave të lëkurës. Ato arrijnë të rigjenerojnë lëkurën, që në kushtet e zonjës, lëkura e saj në moshën aktuale biologjike nuk e ka më këtë aftësi”, shpjegon mjekja.

Rezultati i ndërhyrjes estetike me lifting, jep rezultat të kënaqshëm edhe pse nuk zgjat përgjithmonë.

“Nuk mjafton një seancë, por duhen 2-3. Dhe pas një periudhe të caktuar bie dhe duhet ripërsëritur. Nëse një person nuk do ta përsërisë, kthehet në gjendje të mëparshme, duke mbetur tek mosha e vërtetë biologjike”, tregon mjekja.

Metoda lifting aplikohet specifikisht për pjesë të caktuara të fytyrës dhe si shumica e grave të moshës së saj, xhevria e ka të domosdoshme ndërhyrjen në qafë dhe faqe.

“Ne ndërhyjmë në të gjitha zonat e fytyrës. Zonja është me fat gjenetikisht, nuk ka probleme me mollëzat. Ne do të ndërhyjmë tek qafa dhe pjesa inferiore e fytyrës”, thotë mjekja.

Kjo grua i ka ndjerë edhe më herët favorët e kirurgjisë estetike. Këtë ripërsëritje të seancës ajo e ka ndërmarrë për të forcuar rezultatin në fytyrën e saj.

“Bëra ndërhyrjen e parë, rrudhat filluan të zhdukeshin avash-avash. Dhe thashë ta bëj edhe trajtimin e dytë”, thotë Xhevrija.

Tashmë kjo zonjë është gati të përjetojë rininë e saj të dytë.

Do të injektojmë plaçentë dhe DMS. Ato zhdukin rrudhat, parandalojnë krijimin e rrudhave të vogla, rigjeneron lëkurën.

Me rezultatin e parë 47- vjeçarja ia ka arritur qëllimit. Ka ndjerë një fytyrë më të re, por edhe ka xhelozuar shoqet e saj.

“Kolegët më thanë: ke bërë ndonjë gjë se dukesh ndryshe. Për momentin kam qeshur dhe pas dy ditësh u kam thënë: pse çfarë vini re ju. E pastaj u kam treguar. Kanë thënë: do ta bëjmë edhe ne”, shprehet Xhevrija.

Gjithë ndryshimi përfitohet në vetëm 20 minuta. Pacienti nuk ndjen dhimbje gjatë ndërhyrjes dhe mjekja shpjegon se substancat janë biologjikisht të pranueshme nga organizmi. Rezultati në pasqyrë më pas të jep disa vite më pak.

“Ajo është e lumtur, nuk ka rrudha, ka një fytyrë 10 vjet më të re”, thotë mjekja.

Atë që femrat vuajnë më shumë me shkuarjen e viteve, po e mposhtin falë kirurgjisë estetike. Xhevrija është në radhën e atyre që po bëjnë revolucion në mentalitetin e shqiptarëve. Tani radhën e kanë burrat.

Top Channel