Fiorentina shpërthen në transfertë, katër gola dhe një fitore që vlen shumë për Vanolin

Fiorentina rikthehet te fitorja në Serie A, duke marrë një sukses spektakolar 4-2 në transfertën ndaj Sassuolos, në një ndeshje me gjashtë gola dhe shumë emocione. Skuadra e drejtuar nga Paolo Vanoli tregoi karakter, duke përmbysur dy herë disavantazhin dhe duke siguruar tri pikë të rëndësishme. Ishte Sassuolo që kaloi e para në avantazh në minutën e 25-të. Një gabim i Fagiolit i dha mundësinë Berardit të niste aksionin, ndërsa Laurienté përfitoi nga pasimi i Espositos dhe mposhti De Gean në përballjen me portierin spanjoll.

Fiorentina reagoi në fundin e pjesës së parë, kur në minutën e 47-të Pellegrino riktheu baraspeshën pas një pasimi të Njie. Me të nisur pjesa e dytë, miqtë përmbysën gjithçka. Në minutën e 50-të, Njie realizoi një gol të bukur me një goditje të harkuar me të djathtën, duke çuar rezultatin në 2-1 për skuadrën toskane.

Megjithatë, Sassuolo nuk u dorëzua. Në minutën e 65-të, Laurienté shënoi sërish, duke finalizuar një aksion individual dhe duke vendosur baraspeshën 2-2. Francezi ishte protagonisti kryesor i vendasve, por dy golat e tij rezultuan të pamjaftueshëm për të shmangur humbjen.

Fiorentina kishte ruajtur goditjen vendimtare për minutat e fundit. Në të 79-ën, Mastantuono riktheu miqtë në avantazh pas një pasimi të shkëlqyer të Gonçalves, ndërsa në minutën e 93-të Valdepenas vulosi rezultatin përfundimtar 4-2, pas asistit të Ndour dhe një tjetër aksioni të bukur të Gonçalves. Një fitore me shumë vlerë për Fiorentinën dhe Vanolin, që merr tri pikë në një transfertë të vështirë. Me këtë rezultat, të dyja skuadrat shkojnë në kuotën e tetë pikëve, ndërsa Sassuolo konfirmon problemet e mëdha në prapavijë, me 26 gola të pësuar në kampionat.

Top Channel