Pas 3 vitesh pritje, Hamilton rikthehet në pole, Ferrari dominon, Antonelli në rreshtin e dytë

Russell dhe Leclerc kompletojnë tre vendet e para, ndërsa Antonelli përfiton nga penalizimi i Verstappenit dhe ngjitet në rreshtin e dytë. Lewis Hamilton ka dhuruar një tjetër moment të madh në Formula 1, duke siguruar pole position-in në Çmimin e Madh të Meksikës. Piloti britanik i Ferrarit do ta nisë garën nga vendi i parë, duke rikthyer emrin e tij në krye të klasifikimit të kualifikimeve kryesore për herë të parë që prej vitit 2023.

Hamilton arriti të mposhtë George Russell me vetëm 0.009 sekonda, pasi piloti i Mercedesit kishte vendosur kohën 1:16.523. Britaniku i Ferrarit e kaloi rivalin me një diferencë minimale, ndërsa Charles Leclerc u rendit i treti, duke kompletuar një rezultat të shkëlqyer për skuadrën italiane. Ky është pole position-i i parë i Hamiltonit me Ferrarin në një kualifikim kryesor, pasi më herët gjatë këtij sezoni kishte siguruar edhe vendin e parë në Sprintin e Silverstone.

Ndërkohë, vëmendja është edhe te Kimi Antonelli. Italiani përfundoi kualifikimet në vendin e pestë, por penalizimi me një pozicion i Max Verstappenit bën që piloti i Mercedesit të ngjitet në vendin e katërt, duke siguruar nisjen nga rreshti i dytë. Antonelli do të ketë kështu një mundësi të rëndësishme në Meksikë, ku mund të sigurojë matematikisht titullin e parë kampion bote në karrierën e tij.

Kualifikimet e Çmimit të Madh të Meksikës u transmetuan drejtpërdrejt dhe ekskluzivisht në Digitalb, ashtu si edhe gara e së dielës, që do të sjellë sfidën e radhës në Formula 1. Gara do të zhvillohet të dielën, 1 nëntor, në orën 21:00 me orën e Tiranës. Starti në Meksikë është në orën 14:00 lokale, por diferenca kohore me Shqipërinë është 7 orë.

Top Channel