Interi ka marrë fitoren e parë në këtë edicion të Champions League, duke mposhtur me rezultatin 1-0 Shakhtar Donetsk në “San Siro”.
Zikaltrit vuajtën deri në fund për të siguruar tri pikët, sidomos pas daljes me karton të kuq të Alessandro Bastonit, por në fund arritën të festonin përpara tifozëve të tyre.
Pas dy humbjeve në dy ndeshjet e para, skuadra italiane kishte nevojë për një reagim dhe e gjeti atë në një sfidë të luftuar, ku goli vendimtar erdhi vetëm në minutën e 77-të.
Pjesa e parë u mbyll pa gola, pavarësisht rasteve të krijuara nga të dyja skuadrat. Interi u përpoq të merrte kontrollin e lojës, me Marcus Thuram dhe Ange-Yoan Bonny që patën mundësi për të shënuar, ndërsa Shakhtar u përgjigj me disa tentativa të rrezikshme, duke vënë në provë portierin Josep Martínez.
Në pjesën e dytë, zikaltrit shtuan presionin dhe në minutën e 68-të mbetën me një lojtar më pak, pasi Alessandro Bastoni u ndëshkua me kartonin e dytë të verdhë dhe u largua nga fusha. Një moment që e vështirësoi ndjeshëm misionin e skuadrës së drejtuar nga Cristian Chivu.
Megjithatë, Interi nuk u dorëzua dhe në minutën e 77-të gjeti golin e shumëpritur. Henrikh Mkhitaryan nisi një kundërsulm të shpejtë dhe pasoi për Carlos Augusto, i cili me një goditje të saktë me të majtën dërgoi topin në rrjetë, duke ndezur festën në “San Siro”.
Minutat e fundit ishin të mbushura me tension, pasi Shakhtar Donetsk u hodh në sulm në kërkim të barazimit. Miqtë krijuan disa raste të rrezikshme, por portieri Josep Martínez dhe mbrojtja zikaltër arritën të rezistonin deri në vërshëllimën përfundimtare.
Kështu, Interi siguron fitoren e parë në Champions League pas dy disfatave radhazi.
REZULTATI:
Inter 1-0 Shakhtar Donetsk
Carlos Augusto 77’
Goli i Carlos Augustos (Video)
Top Channel
