Gerry Cardinale duket i vendosur të mbështesë financiarisht Milanin në një nga periudhat më delikate të projektit të tij në krye të klubit kuqezi.
Sipas raportimit të La Gazzetta dello Sport, pronari i Milanit ka injektuar 50 milionë euro në kapitalin e klubit gjatë javëve të fundit dhe mund të kryejë një tjetër ndërhyrje financiare në muajt e ardhshëm. Një lëvizje që shihet si një sinjal i fortë mbështetjeje për Milanin, i cili po përballet me pasojat financiare dhe sportive të mungesës në Champions League për sezonin e dytë radhazi.
Ndërhyrja e Cardinale vjen në një moment të rëndësishëm për administrimin e klubit. Bilanci financiar i mbyllur më 30 qershor 2026 regjistroi një humbje prej 24 milionë eurosh, duke i dhënë fund një serie prej tri vitesh radhazi me bilance pozitive.
Milani kishte regjistruar fitim prej 6 milionë eurosh në sezonin 2022-2023, 4 milionë eurosh në 2023-2024 dhe 3 milionë eurosh në 2024-2025. Për sezonin financiar 2026-2027 parashikohet sërish një deficit, megjithëse pjesëmarrja në Europa League mund të ndihmojë në zbutjen e ndikimit ekonomik. Megjithatë, injektimi i kapitalit nuk lidhet me një emergjencë për të mbuluar mungesën e kapitalit të klubit. Pas përthithjes së humbjes së fundit, Milani kishte një kapital neto prej 176 milionë eurosh më 30 qershor 2026. Synimi i ndërhyrjes së pronarit është t’i sigurojë klubit burimet e nevojshme për likuiditetin e përditshëm dhe investimet, duke kufizuar nevojën për të rritur borxhin financiar.
Në maj, Cardinale kishte deklaruar për La Gazzetta dello Sport se roli i tij ishte të siguronte burimet financiare dhe të ndërtonte një skuadër fituese. “Unë nuk mund të drejtoj stërvitjen. Nuk mund të shënoj gola. Nuk mund të mbroj në fushë. Por mund të siguroj burimet financiare dhe të ndërtoj një skuadër fituese”, ishte shprehur ai, duke theksuar se nuk do të ndalej derisa të arrinte fitoren. Tani, injektimi i 50 milionë eurove shihet si një hap konkret në këtë drejtim. Sipas raportimit italian, në planet e Milanit për merkaton e janarit janë edhe Gonçalo Inácio, mbrojtësi portugez i Sportingut, dhe Endrick, sulmuesi brazilian i Real Madridit.
Mbetet për t’u parë nëse këto objektiva do të konkretizohen dhe sa do të ndikojë mbështetja financiare e Cardinale në përforcimin e skuadrës. Një tjetër injektim kapitali në muajt e ardhshëm nuk përjashtohet, por shuma dhe koha e tij ende nuk janë përcaktuar. Pavarësisht vështirësive të fundit, të dhënat financiare tregojnë se Milani ka ende një bazë të konsiderueshme kapitali dhe një nivel borxhi financiar neto prej 145 milionë eurosh, dukshëm më të ulët se 331 milionët e raportuar për Juventusin. Për Cardinale, sfida tashmë është që mbështetja ekonomike të përkthehet në rezultate sportive dhe rikthim në elitën e futbollit evropian.
Top Channel
