Ceferin ndryshon qëndrim, rikandidon për një mandat të fundit në krye të UEFA-s: Të mbajmë futbollin europian të bashkuar

Čeferin ua ka komunikuar vendimin presidentëve dhe sekretarëve të përgjithshëm të 55 shoqatave anëtare të UEFA-s. Sipas organizatës, në muajt e fundit federatat kombëtare i kishin kërkuar unanimisht atij të rishqyrtonte vendimin e mëparshëm për të mos kërkuar një tjetër mandat.

Presidenti i UEFA-s ka pranuar kërkesën dhe ka konfirmuar kandidaturën për rizgjedhje në Kongresin e 51-të të Zakonshëm të UEFA-s, i cili është planifikuar të zhvillohet më 22 prill 2027 në Astana të Kazakistanit.

“Dua të falënderoj shoqatat kombëtare për besimin e tyre. Në vitet e fundit, jemi përballur me sfida të jashtëzakonshme dhe e kemi bërë këtë si një ekip i bashkuar. Ka ende shumë punë të rëndësishme për t’u bërë dhe për këtë arsye e kam pranuar kërkesën e tyre”, u shpreh Čeferin.

Ai theksoi se objektivi i tij mbetet ruajtja e unitetit të futbollit europian dhe forcimi i UEFA-s.

“Ambicia ime mbetet e njëjtë: ta mbaj futbollin europian të bashkuar, ta bëj sportin tonë më të fortë dhe ta lë UEFA-n gati për gjeneratën e ardhshme”, tha ai.

Čeferin shprehu gjithashtu mirënjohjen ndaj familjes së tij për mbështetjen në vendimin për të vijuar në krye të UEFA-s.

Në takimin e zhvilluar në Berlin është diskutuar edhe e ardhmja e qeverisjes dhe lidershipit të FIFA-s.

Sipas UEFA-s, të gjitha 55 shoqatat kombëtare, me përjashtim të Federatës së Futbollit të Azerbajxhanit, kanë rënë dakord për një drejtim të përbashkët lidhur me reformën e FIFA-s.

Federatat kanë shprehur pakënaqësi ndaj lidershipit aktual të organizatës botërore dhe kanë kërkuar ndryshime më të thella institucionale.

Në deklarimin e tyre, shoqatat theksojnë se vetëm reforma institucionale nuk është e mjaftueshme dhe se FIFA ka nevojë edhe për një lidership të ri.

Sipas tyre, drejtuesi i ardhshëm duhet të jetë një figurë e respektuar dhe unifikuese, me përvojë të thellë në futboll, vizion dhe aftësi për të fituar besimin e të gjitha rajoneve.

Federatat europiane kërkojnë gjithashtu që drejtimi i FIFA-s të ketë një angazhim të qartë ndaj zhvillimit, reformës, integritetit dhe pavarësisë së organizatës.

Një tjetër takim i 55 shoqatave kombëtare të UEFA-s pritet të zhvillohet deri më 17 nëntor 2026, ku pritet të vijojë diskutimi mbi të ardhmen e qeverisjes së futbollit europian dhe atij botëror.

Top Channel