Interi mbyll bilancin me fitim, 518 milionë euro të ardhura dhe financa pozitive

Klubi zikaltër ka raportuar plot 518 milionë euro të ardhura, që shënon rezultatin e dytë më të mirë në historinë e tyre, pas rekordit të vitit të kaluar. Ky sukses financiar ka ardhur falë një menaxhimi më të kujdesshëm, ku shpenzimet e klubit janë ulur me 4%, ose thënë ndryshe, janë kursyer rreth 20 milionë euro.

Një shtysë të madhe në këto shifra pozitive e kanë dhënë vetë tifozët. Të ardhurat nga shitja e produkteve zyrtare të klubit janë rritur me 7% falë bashkëpunimit me kompaninë “Fanatics”, ndërsa arkëtimet nga biletat e ndeshjeve kanë pësuar gjithashtu rritje të ndjeshme. Edhe merkatoja e lojtarëve ka lënë gjurmë pozitive, duke i sjellë klubit 11 milionë euro më shumë fitime nga shitblerjet krahasuar me sezonin e kaluar.

Lajmi më qetësues për drejtuesit është përgjysmimi i borxheve. Falë një marrëveshjeje të re financiare, Interi ka kursyer plot 19 milionë euro nga interesat bankare, duke e rikthyer pasurinë e përgjithshme të klubit sërish në shifra pozitive (10.4 milionë euro), pasi një vit më parë ishte në minus.

Ndërkohë, projekti sportiv vazhdon me hapa të sigurt. Trajneri Cristian Chivu, tashmë në vitin e tij të dytë në stol, ka në dispozicion një skuadër të përforcuar me talente të reja për të mbrojtur titullin e Serie A dhe për t’u përballur me sezonin e nëntë radhazi në Champions League.

Paralelisht, Interi po mendon edhe për të ardhmen. Klubi prezantoi sponsorin e ri, bankën BBVA, e cila do të shfaqet në mëngët e fanellave të ekipit të parë dhe si sponsor kryesor për ekipet e moshave. Gjithashtu, zikaltrit kanë nisur një plan investimesh të rëndësishme për modernizimin e qendrave stërvitore në Appiano Gentile dhe Interello, duke konfirmuar ambicien për t’u rritur jo vetëm brenda, por edhe jashtë fushës së lojës.