Deri më sot nuk ka zhvilluar asnjë ndeshje zyrtare me Chelsea dhe tani është lënë jashtë kombëtares italiane nga Roberto Mancini. Çfarë po ndodh me Marco Palestrën? Për ata që nuk i ndjekin historitë e Premier League, situata e 21 vjeçarit i kaluar nga Atalanta te Blutë për një vlerë prej 60 milionë eurosh mund të duket një mister.
Në realitet nuk është kështu; Palestra, që u kërkua edhe nga Interit, është në infermieri për një dëmtim të lehtë muskular dhe nuk është akoma gati që të kthehet të luajë. Xabi Alonso ka folur për një lodhje në zonën e kuadricepsit duke nënvizuar se futbollisti italian është në fazën finale të rikuperimit. Për këtë arsye, Palestra ka munguar në 7 ndeshjet e para të sezonit; 5 në Premier League dhe 2 në Kupën e Ligës.
Italiani qëndroi në tribunë edhe në humbjen 3-0 që Chelsea pësoi në transfertë ndaj Brentford duke mbyllur pjesën e parë të sezonit te Chelsea, përpara se të konfirmohej edhe mungesa e tij në listën e të grumbulluarve të Mancinit për sfidat e Nations League. Një zgjedhje kjo që ishte thuajse e detyruar, për t’i dhënë mundësinë futbollistit që të punojë me qetësi gjatë kësaj pauze 3 javore për ndeshjet e kombëtareve me objektivin që të kthehet të luajë në 10 tetor në sfidën e Stamford Bridge ndaj Bournemouth.
Palestra e kishte bindur Xabi Alonson gjatë miqësoreve të verës për cilësitë e tij, me futbollistin që ishte praktikisht gjithnjë titullar. Bëri një paraqitje të mirë në fitoren 3-0 ndaj Milanit, por ai impresionoi më shumë në pjesën e parë në sfidën e humbur ndaj Juventusit. Thuajse shenjë e fatit; objektivi i merkatos së Interit që shfaq kualitetet e tij kundër rivalëve historikë të zikaltërve, por duke veshur një tjetër fanellë dhe tani është në pritje ta veshë atë në ndeshjet zyrtare dhe të kthimit të tij në kombëtaren italiane.
Top Channel
