Peter Max, artisti që i dha ngjyra epokës së “Flower Power”, ndërron jetë në moshën 88-vjeçare

Lajmin e ka bërë të ditur familja e tij. Shkaku i vdekjes nuk është bërë publik, ndërsa vitet e fundit Max kishte përballuar probleme të rënda shëndetësore, përfshirë demencën e avancuar.

Max u bë i njohur për dizajnet shumëngjyrëshe, imazhet kozmike, lulet dhe figurat që pasqyronin optimizmin dhe kulturën jokonvencionale të viteve 1960. Veprat e tij u bënë pjesë e artit pop dhe psikedelik të asaj periudhe, duke dalë përtej galerive dhe duke u shfaqur në postera, produkte të përditshme, kopertina dhe fushata publike.

Popullariteti i artistit vazhdoi për dekada. Punimet e tij u shfaqën në pulla postare, në një avion Boeing 777 dhe një anije turistike, ndërsa ai realizoi gjithashtu vepra për ngjarje të mëdha sportive, përfshirë Lojërat Olimpike, Super Bowl, Indianapolis 500, Kupën e Botës dhe Seritë Botërore.

Peter Max lindi në Berlin në vitin 1937, me emrin Peter Max Finkelstein, në një familje hebreje. Kur ishte ende foshnjë, familja e tij u largua nga Gjermania naziste dhe u vendos në Shangai.

Gjatë viteve të mëvonshme, ai jetoi në Tibet, Izrael dhe Paris, përpara se të vendosej në Nju Jork në moshën 16-vjeçare. Pikërisht në SHBA nisi të zhvillonte stilin artistik që do ta bënte të njohur në të gjithë botën.

Në fillim të karrierës, Max punoi kryesisht në dizajnin grafik, përpara se t’i rikthehej pikturës dhe të krijonte gjuhën e tij të veçantë vizuale.

Gjatë karrierës së tij, Max realizoi portrete të shumë figurave të njohura, nga presidentë amerikanë te artistë dhe personazhe të kulturës pop.

Një prej temave më të përsëritura në krijimtarinë e tij ishte Statuja e Lirisë, e cila u shndërrua në një nga simbolet më të dallueshme të veprës së tij.

Max synonte që arti të ishte sa më i aksesueshëm për publikun e gjerë, duke e lidhur pikturën me jetën e përditshme dhe kulturën masive.

Trashëgimia e tij mbetet e lidhur ngushtë me shpërthimin krijues të viteve 1960, kur arti, muzika dhe kundërkultura në Shtetet e Bashkuara krijuan një estetikë të re që do të ndikonte edhe përtej kufijve amerikanë.

Top Channel