“Nuk më besohet çfarë tha”/ Vëllai i Princeshë Dianës: Mbreti Charles dukej jashtëzakonisht i gëzuar natën e vdekjes së saj

Në kujtimet e tij të ardhshme, të titulluara “Swan Song”, Spencer pretendon se Charles, i cili në atë kohë mbante titullin Princ i Uellsit, i telefonoi pak pas vdekjes së Dianës dhe se gjatë bisedës dukej “jashtëzakonisht i gëzuar”, duke e krahasuar gjendjen e tij me atë të “një fituesi të lotarisë”.

Sipas një tjetër ekstrakti të publikuar nga Daily Mail, Spencer shkruan se kjo mënyrë e të folurit të Charles e kishte befasuar thellë.

Diana, Princesha e Uellsit, humbi jetën në gusht të vitit 1997, pasi pësoi dëmtime të rënda të brendshme në një aksident automobilistik në Paris. Në funeralin e saj, më 6 shtator 1997, djemtë e saj, Ëilliam dhe Harry, atëherë përkatësisht 15 dhe 12 vjeç, ecën pas arkivolit të nënës së tyre.

“Do ta harrojmë mjaft shpejt”

Në një tjetër pjesë të librit, Spencer pretendon se disa ditë pas vdekjes së Dianës, Charles reagoi me zemërim kur ai kundërshtoi idenë që Ëilliam dhe Harry të merrnin pjesë në kortezhin funeral.

Spencer shkruan se Charles nisi një “varg zemërimi” gjatë një bisede telefonike dhe më pas i tha: “Mos ki merak, do ta harrojmë mjaft shpejt!”

Sipas Spencer, ai iu përgjigj: “Nuk mund ta besoj që sapo e the këtë”, përpara se ta mbyllte telefonin.

Pretendimet janë pjesë e kujtimeve të Charles Spencer, të cilat pritet të publikohen së shpejti dhe që përmbajnë rrëfime të detajuara mbi marrëdhënien e Dianës me familjen mbretërore.

Buckingham Palace reagon

Pallati Buckingham reagoi ndaj pretendimeve të Spencer me një deklaratë të pazakontë, duke theksuar se nuk komenton zakonisht libra të këtij lloji.

Në deklaratë thuhej se Mbreti Charles është i vetëdijshëm se dhimbja e humbjes së një vëllai apo motre mund të ndikojë në mënyrën se si një person kujton dhe interpreton ngjarjet, edhe shumë vite më vonë.

“Dhimbja e pikëllimit vëllazëror mund të mjegullojë arsyen, të ndikojë në gjykim dhe të ngjyrosë kujtesën në mënyra që të tjerët nuk i kuptojnë”, thuhej në deklaratë. Pallati nuk pati komente të tjera për ekstraktet e reja të librit.

Pretendime të tjera për marrëdhënien e Dianës me Charles

Në librin e tij, Spencer flet gjithashtu për marrëdhënien e vështirë mes Dianës dhe Charles para dhe gjatë martesës së tyre.

Sipas tij, Diana kishte gjetur një byzylyk që i fejuari i saj i kishte blerë Camillës, në një kohë kur ajo dhe Charles ishin të fejuar. Spencer pretendon gjithashtu se Diana u përpoq të tërhiqej nga martesa.

Një tjetër episod i përmendur në libër lidhet me një koment që Charles dyshohet se i bëri Dianës pak pas fejesës, duke e quajtur “topolake”. Sipas Spencer, ky koment e kishte prekur thellë Dianën, e cila vuante nga një çrregullim i të ushqyerit.

Shumë prej këtyre historive janë raportuar edhe më parë në libra biografikë dhe nga media të ndryshme.

Charles Spencer është vëllai i Princeshë Dianës dhe një nga personat më të afërt me të gjatë jetës së saj. Kujtimet e tij pritet të publikohen javën e ardhshme dhe kanë tërhequr vëmendje të madhe për shkak të pretendimeve të reja mbi familjen mbretërore dhe marrëdhënien mes Dianës dhe Charles.

Top Channel