Matthew Rhys bën histori në Emmy Awards, bëhet aktori i parë që fiton dy çmime kryesore në një natë

Rhys u vlerësua në ceremoninë prestigjioze amerikane për interpretimet e tij në komedinë televizive me elemente mbinatyrore “Widow’s Bay” dhe në thrillerin psikologjik “The Beast in Me”.

Aktori mori fillimisht çmimin për aktorin më të mirë në një mini-serial, për rolin në “The Beast in Me”, dhe më vonë triumfoi edhe në kategorinë aktorin më të mirë në një serial komedi, për “Widow’s Bay”.

“Jemi një komb i vogël, por i fuqishëm”

Gjatë fjalimit të tij të dytë në skenë, Rhys ia dedikoi çmimin Uellsit dhe njerëzve të tij. “Për njerëzit e mëdhenj dhe të mirë të Uellsit, të cilët kanë qenë po aq pjesë e formimit tim sa kushdo tjetër”, tha ai.

“Jemi një komb i vogël, por i fuqishëm. Kjo është e pabesueshme”, u shpreh aktori, përpara se ta mbyllte fjalimin me shprehjen në uellsisht: “Diolch yn fawr iawn”, që do të thotë “faleminderit shumë”.

Rhys tha më vonë se ndihej krenar që vinte nga një vend i vogël dhe se momente të tilla i japin mundësinë Uellsit të tregojë se mund të ketë një ndikim shumë më të madh nga sa sugjeron madhësia e tij.

Rekord i ri në Emmy

Disa aktorë të njohur, mes tyre Alan Alda, Sally Field, John Goodman, Elisabeth Moss dhe Ted Danson, ishin nominuar më parë për dy çmime kryesore të aktrimit në të njëjtin vit.

Megjithatë, Rhys është i pari që arrin t’i fitojë të dyja kategoritë. Aktori mori pjesë në ceremoninë e Emmy-t së bashku me partneren e tij, aktoren amerikane Keri Russell, e cila ishte gjithashtu e nominuar për një çmim.

Në “The Beast in Me”, historia ndjek një shkrimtare të pikëlluar, të interpretuar nga Claire Danes, e cila fiksohet pas një fqinji të ri misterioz, të dyshuar për vrasje. Rhys e cilësoi fitoren si një “surprizë të vërtetë” dhe falënderoi Danes për mundësinë për t’u bërë pjesë e historisë.

Edhe Kate O’Flynn triumfon

Një tjetër fituese britanike e mbrëmjes ishte aktorja Kate O’Flynn, bashkëprotagoniste e Rhys në “Widow’s Bay”. O’Flynn fitoi çmimin për aktoren më të mirë në rol dytësor në një serial komedi, për interpretimin e Patricia-s.

Seriali tregon historinë e një ishulli imagjinar që përballet me një mallkim shekullor. Në fjalimin e saj, O’Flynn falënderoi producentët e “Widow’s Bay” për besimin që i dhanë dhe e cilësoi rolin si “rolin e një jete”.

Jean Smart dhe Allison Janney barazojnë rekordin

Një tjetër moment i rëndësishëm i ceremonisë erdhi nga Jean Smart dhe Allison Janney. Smart fitoi çmimin për aktoren më të mirë në një serial komedi për sezonin e pestë dhe të fundit të “Hacks”. Ky ishte Emmy i saj i pestë për serialin dhe i teti në karrierë.

Pak minuta më vonë, edhe Allison Janney fitoi Emmy-n e tetë të karrierës së saj, duke marrë çmimin për aktoren më të mirë në rol dytësor në një serial dramë për “The Diplomat”.

Me këto fitore, Smart dhe Janney barazuan rekordin për numrin më të madh të çmimeve Emmy të fituara ndonjëherë nga një aktore, rekord që mbahet gjithashtu nga Cloris Leachman dhe Julia Louis-Dreyfus.

Ndërkohë, Janney tha se ishte “vërtet e shokuar” nga fitorja, pasi përballë kishte disa prej aktorëve kryesorë të serialit mjekësor “The Pitt”.

“The Pitt” fiton çmimin kryesor

Seriali “The Pitt” fitoi çmimin për dramën më të mirë, një prej vlerësimeve më prestigjioze të mbrëmjes. Aktori kryesor Noah Wyle fitoi gjithashtu çmimin për aktorin më të mirë në një serial dramë, për të dytin vit radhazi.

“Jam një fëmijë i Hollywood-it. Jam rritur përpara televizorit dhe kinematë ishin vendi im i adhurimit”, tha Wyle gjatë fjalimit.

“Kjo është gjithçka që kam dashur të bëj dhe ky është i vetmi klub ku kam dashur të bëj pjesë. Faleminderit që më pranuat”, shtoi ai.

Ndërkohë, Rhea Seehorn fitoi Emmy-n e parë të karrierës së saj, duke u shpallur aktorja më e mirë në një serial dramë për rolin në “Pluribus”, seriali i Apple TV+ ku personazhi i saj zbulon se pothuajse të gjithë njerëzit në botë janë prekur nga një virus misterioz që kontrollon mendjen.

Top Channel