Kapiteni i kombëtares së futbollit të Kroacisë dhe ylli i Milanit, Luka Modrić, më 9 shtator festoi ditëlindjen e tij të 41-të.
Modrić e festoi ditëlindjen në prani të familjes. Pranë tij ishin e ëma, serbja Radojka, dhe i ati, kroati Stipe, të cilët u mblodhën për ta bërë më të veçantë këtë datë. Luka rrallëherë publikon foto me të ëmën në profilin e tij në Instagram, ndaj kjo ishte një mundësi e rrallë për t’i parë së bashku dhe të buzëqeshur, foto kjo që “ndezi” rrjetet sociale.
A e dini historinë e origjinës së Luka Modrić?
Kapiteni i kombëtares së Kroacisë, Luka Modrić, vjen nga një martesë mikse. Për shumë njerëz është i panjohur fakti se Luka Modrić nga ana e babait është kroat, ndërsa e ëma e tij është serbe. Përveç kësaj, vlen të përmendet se anëtarë të familjes së tij nga ana e nënës humbën jetën në Luftën e Dytë Botërore, si dhe se një nga komandantët e ushtrisë së e ashtuquajtura Republika Srpska Krajina (entiteti serb i vetëshpallur në territorin e Kroacisë), ishte i afërm i tij i ngushtë.
Vitet e fundit flitet e shkruhet shumë për origjinën e Luka Modrić, futbollistit më të mirë kroat të të gjitha kohërave dhe një prej lojtarëve më të mirë të ditëve të sotme.
Ylli i Milanit dhe kapiteni i kombëtares së Kroacisë prej vitesh mban veshur fanellën e ekipit kombëtar, por ai ka edhe origjinë serbe. Nëna e Lukës, Radojka, është serbe nga fshati Kruševo pranë Obrovacit. Ky vendbanim, kryesisht i banuar nga kroatë, aktualisht numëron rreth 1,100 banorë, ndërsa familja Dopuđ prej kohësh ishte e vetmja familje serbe atje. Sipas regjistrimit të vitit 1991, në këtë vend jetonin 107 serbë.
Nga ana tjetër e trungut familjar, Modrić vjen nga fshati Zaton Obrovački, dhe Luka deri në moshën gjashtëvjeçare jetoi në fshatin e lindjes të babait të tij, Stipe. Për shkak të luftës në territorin e Kroacisë së sotme, familja u zhvendos në Zadar në vitin 1991, ku Luka u rrit dhe hodhi hapat e parë në futboll.
Talenti i tij te ekipi i Zadrit u pikasa shpejt nga Dinamo e Zagrebit, e cila e mori që në moshën 15-vjeçare. Që nga viti 2001, Modrić është pjesë e ekipeve kombëtare të Kroacisë, ndërsa origjina e tij gjysmë serbe doli veçanërisht në qendër të vëmendjes kur festoi suksesin më të madh me fanellën e kombëtares.
Pas Kampionatit Botëror në Rusi ku kroatët luajtën në finale, Luka Modrić në pritjen e organizuar në atdhe këndoi krah Marko Perković “Thompson”, muzikantit që glorifikon lëvizen për Shtetin e Pavarur të Kroacisë. Të dy ata, së bashku me disa futbollistë të tjerë dhe përzgjedhësin Zlatko Dalić, ishin figurat qendrore të festës pas humbjes nga Franca në finalen e Kampionatit Botëror.
Top Channel
