Amorim: Të jesh i pari për një natë vlen vetëm për fëmijët, na duhet kohë

Në Romë, në një përballje shumë të delikate kundër Lazios dhe përballë një prej legendave të të kaluarës kuqezinj, Ruben Amorim e nisi konferencën për shtyp duke folur për trajnerin bardhekaltër, Rino Gattuso: “Gjëja e parë për nesër është se Lazio është një skuadër me shumë shpejtësi dhe me një identitet të madh. Frattesi ishte një goditje e madhe, u jep shumë agresivitet përpara. Kanë dy lojtarë krahu që janë të aftë me topin dhe një sulmues të ri. Është një ekip që është mirë pas tri fitoreve. Humbën në Kupën e Italisë dhe më pas e nisën Serie A në këtë mënyrë, futbolli është i çuditshëm. Gattuso është një legendë e Milanit: talenti nuk është gjithçka. Pasioni që ai kishte është diçka që duhet ta rigjejmë te klubi ynë. Ka munguar vitet e fundit dhe duhet nxjerrë në fushë. Me pasion dhe përkushtim mund të kapërcehen probleme të ndryshme.”

Mbi vështirësitë ndaj Juventusit “Kemi folur dhe kemi punuar mbi shumë gjëra që i bëmë gabim në ndeshjen e fundit. Na mungoi energjia. E kontrolluam mirë topin në pjesën e parë, por na mungoi agresiviteti në zonën e fundit për të dërguar mjaftueshëm lojtarë në zonën e rreptësisë. U tregova djemve se rastet e Juventusit erdhën nga topa tanë të humbur pa presion, nga pasime të gabuara dhe të plogështa. Janë situata që mund të bëjnë diferencën.”

Për Gonçalo Ramos “Nuk duhet të kapemi pas një lojtari të vetëm: nuk luajtëm mirë si skuadër. Nëse e humbim topin pa presion, kemi shumë probleme… Kur Ramos kishte topin, mirëkuptimi me shokët e skuadrës nuk ishte më i miri dhe ai e di këtë. Duhet të përmirësohemi si ekip: kundër Torinos dhe Venezias bëri shumë mirë. Në ato ndeshje treguam se dimë si ta furnizojmë, ndërsa kundër Juventusit nuk bëri të njëjtën paraqitje. Ramos është një lojtar që mund të japë rendiment shumë të lartë.”

A është e vërtetë se Modrić vuan në lojën tuaj? “Përmban logjikë si arsyetim, Luka nuk mund të bëjë presion gjithmonë, por nga ana tjetër ka gjithmonë në dorë tempon e lojës dhe e kupton atë më mirë se kushdo tjetër. Si trajner më duhet të zgjedh. Ndoshta humbasim diçka në presion, por me topin në zotërim kemi më shumë kontroll kur Modrić është në fushë. Kundër Juventusit ndoshta pati më pak presion dhe hera-herës Douglas Luiz pati më shumë kohë për të menaxhuar, por shikoni kur e kishim ne topin. Mendoj se nëse duhet të humbasim diçka, është më mirë ta humbasim pa topin, ndërsa me topin duhet të kemi gjithmonë atë diçka më shumë. Dhe Luka na e jep atë diçka më shumë. E kuptoj këtë kritikë, është me vend, por duhet pasur një pamje e plotë: Modrić na lejon një menaxhim më të mirë të topit dhe unë dua një skuadër dominuese në posedim.”

A mendoni se skuadra po rritet? “Duhet të përmirësohemi në çdo seancë stërvitore. Nëse diçka nuk shkon, marrim shumë informacione dhe i çojmë në stërvitje. Pas Juventusit pamë se çfarë duhet të bëjmë në ato situata. Do ta shohim nesër. Sa i përket pjesës së parë të pyetjes: kam punuar më parë në një klub që ka shumë legenda, dhe legendat kanë opinione shumë të forta. Mirëpo unë jetoj në një epokë tjetër dhe e di se çfarë momenti po kalon klubi, por nuk dua që lojtarët e mi të harrojnë rëndësinë e të luajturit dhe të fituarit për Milanin. Për mua është gjëja më e rëndësishme. Kemi nevojë për kohë, por varet nga klubi dhe jo nga unë se sa kohë kemi. Duhet të ndërtojmë një bazë për të fituar me kontinuitet dhe kjo kërkon kohë. Po të shohim në Premier League, sa kohë i u desh Arsenalit për të fituar? Po në Itali me Juventusin dhe Interin? Duhet kohë për të fituar me qëndrueshmëri dhe duhet ndërtuar diçka. Dhe për të fituar kohë, duhet të fitojmë të shtunën. Duke fituar, do të kemi më shumë kohë për të ndërtuar projektin tonë.”

Kush do të luajë pas Ramosit kundër Lazios? “Nuk do të tregoj se kush do të luajë. Pulisic po stërvitet mirë, Cisse po bën mirë, po ashtu edhe Saelemaekers. Hutchinson po përmirëson kondicionin fizik, është edhe Loftus-Cheek… Po të shihni ndeshjet e fundit, kush ka hyrë nga stoli ka ndryshuar lojën, kjo është gjë e rëndësishme. Nuk do të zbuloj përbërjen, por kam ndjesinë se në fushë do të jetë një skuadër e fortë.”

A është Cisse gati për kombëtaren? Dhe sa i përket renditjes: me një fitore do të ishit të parët për një natë. “Renditja nuk më intereson në këtë moment. Të jesh i pari për një natë nuk është diçka speciale, vlen për fëmijët, për tim bir (qesh, shën. red.). Cisse, po të luante me kombëtaren, do të luante i lirë, është gati. Por mendoj se duhet më shumë kohë për të ndihmuar rritjen e tij: unë tashmë kam vërejtur një diferencë mes ndeshjeve brenda dhe atyre jashtë fushës. Të luash në ‘San Siro’ është e vështirë, jepini kohë. Por nëse e grumbulloni në kombëtare nuk do të jetë i turpshëm, do të luajë. Sidoqoftë, jepini kohë për t’u bërë lojtari që mund të bëhet.”

Top Channel