Biejnë yjet në Torino/ Notat e plota, zëvendësuesit bëjnë diferencën, dështojnë titullarët e Amorim dhe Spallettit.

Në një ndeshje të ekuilibruar, diferencën e bënë lojtarët e ardhur nga stoli, me Gatti-n që shpëtoi bardhezinjtë dhe Cisse-n që gjeti menjëherë rrjetën për kuqezinjtë. Por nëse mbrojtjet zhvilluan një ndeshje pozitive, nuk mund të thuhet e njëjta gjë për disa nga yjet e sulmit dhe mesfushës që zhgënjyen totalisht.

Më poshtë, vlerësimet e plota për lojtarët e të dyja skuadrave:

NOTAT E JUVENTUSIT

• VICARIO 6 – E sheh Cisse-n t’i shfaqet në zonën e vogël papritur, sepse para kësaj praktikisht nuk i kishte bërë pis dorezat.

• KALULU 6 – E mban mirë fushën dhe ofrohet shpesh përpara.

• BREMER 6.5 – Nuk i lëshon asnjë hapësirë Gonzalo Ramos.

• LUCUMI 6 – Bën detyrën e tij pa asnjë gabim.

• CELIK 5.5 – Moreira i bën thjesht “gudulisje”, por është mungesë e tij kur Chukwueze gjen Cisse-n me asistin fitues.

• GATTI 7 – Shpëton Juven me kokë. Si qendërsulmues i shtuar tregohet shumë më i rrezikshëm se Kolo Muani.

• LOCATELLI 5.5 – Luan pastër, por më pas ka përgjegjësi te goli i Cisse-s që e nxjerr jashtë ritmit.

• DOUGLAS LUIZ 5.5 – Fillon mirë me një regji të kujdesshme, por më pas humbet në fushë. (Nga 75′ Woltemade 6 – I gjallë, meriton vëmendje).

• CONCEICAO 6.5 – I papërmbajtshëm, bindshëm lojtari më i rrezikshëm. Në pjesën e parë detyron Maignan të bëjë dy pritje jo banale, ndërsa në të dytën godet shtyllën. (Nga 88′ Zhegrova – Pa notë).

• NICO GONZALEZ 6 – Fillon mirë, në minutën e 11-të një depërtim i bukur i tij impenjon Maignan, por më pas bëhet shumë i paqëndrueshëm. (Nga 63′ Koopmeiners 6.5 – Ka meritën që gjen kokën e Gatti-t dhe jep asistin e golit të barazimit).

• ALAJBEGOVIC 5.5 – Tregon disa shkëndija interesante, por zhduket në pjesën e dytë. (Nga 63′ Boga 5.5 – Jep shumë pak).

• KOLO MUANI 4 – Nuk e godet asnjëherë saktë. Humbet një sasi të pabesueshme topash dhe e vetmja gjë e mirë që bën është një top i bukur për Conceicao-n.

Trajneri:

• SPALLETTI 6.5 – Goli i barazimit bardhezi vjen ekskluzivisht nga zëvendësimet e tij: krosim i Koopmeiners dhe finalizim nga Gatti.

NOTAT E MILANIT

• MAIGNAN 6.5 – Amortizon mirë dy gjuajtje të majta të Conceicao-s. Në pjesën e dytë, fati dhe shtylla e shpëtojnë nga një goditje e portugezit.

• GILA 6.5 – Solid dhe autoritar në prapavijë. Detyrohet të lërë fushën pas një goditjeje në gju. (Nga 87′ Terracciano – Pa notë).

• DE WINTER 7 – Nuk gabon asgjë. Mbyllje të sakta dhe një kohëzgjatje e përsosur në ndërhyrje. “Mur” i vërtetë.

• PAVLOVIC 6 – Bën një ndeshje të ndershme në “llogore”, duke luftuar fort me sulmuesit kundërshtarë.

• MOREIRA 4.5 – Shumë konfuz dhe i pasaktë. Humbet pafund topa dhe kur gjen hapësirë për të krosuar, pothuajse gjithmonë e dërgon topin jashtë mase. (Nga 60′ Chukwueze 6.5 – Jep një hapje fantastike për golin e Cisse).

• MUSAH 5 – Humbet një sasi të madhe topash në mesfushë, edhe pse vrapon dhe sakrifikon sa për dy lojtarë.

• MODRIC 6 – Regji e pastër, por disi anonime. Nuk bën gabime, por i mungojnë shkëndijat që priten prej tij. (Nga 81′ Jashari – Pa notë).

• ESTUPINAN 5.5 – Një paraqitje pa lavdi dhe pa ndonjë gabim flagrant. Ndeshje normale.

• RABIOT 5 – Luan me teprime dhe nuk lë asnjëherë gjurmë. Kulmi vjen kur i dhuron Juventusit një goditje këndi nga një pasim mbrapa i pakuptueshëm. (Nga 60′ Loftus-Cheek 5 – Shton fizikalitetin në mesfushë, por surprizohet rëndë nga Gatti me rastin e golit të barazimit).

• SAELEMAEKERS 5 – Duket shumë pak në fazën e ndërtimit të lojës dhe shpërdoron mjaft topa. (Nga 60′ Cisse 7 – Topin e parë që prek, e dërgon në rrjetë. I ftohtë dhe i saktë para porte; qyteti i Torinos i sjell fat, pasi aty i kishte shënuar edhe granatave golin e parë).

• RAMOS 5.5 – Lëviz në të gjithë frontin e sulmit, por në asnjë moment nuk arrin të “thumbojë” mbrojtjen bardhezi.

Trajneri:

• AMORIM 6 – Skuadra e tij e ka marrë tashmë një fizionomi të caktuar dhe është vendosur mirë në fushë, por fatkeqësisht, vuan jashtë mase për të ndërtuar aksione dhe raste të pastra për gol.

Top Channel