Video/ Moment i pazakontë në Argjentinë, notari përballet me një “sulm puthjesh” nga luanët e detit

Ngjarja ka ndodhur në Puerto Madryn, një nga destinacionet më të njohura të Argjentinës për aktivitetet detare dhe vëzhgimin e kafshëve të egra.

Në videon, e cila fillimisht u publikua në TikTok dhe më pas u shpërnda në platforma të tjera, notari shihet në ujë, ndërsa disa luanë deti i afrohen.

Një prej kafshëve i afrohet shumë pranë fytyrës së tij, duke krijuar përshtypjen se po e “puth”. Pamjet kanë tërhequr menjëherë vëmendjen e përdoruesve në rrjetet sociale dhe videoja është bërë virale.

Un flaco se fue a nadar 8am en Puerto Madryn y fue atacado a besos por una banda de lobos marinos. pic.twitter.com/tG3uQiR4Xs

— Valentina Etu 🇦🇷 (@ValentinaEtu_) August 17, 2026

Në postimet që shoqërojnë videon thuhet se burri kishte dalë për të notuar rreth orës 08:00 në Puerto Madryn, kur u rrethua nga një grup luanësh deti që iu afruan në mënyrë të pazakontë.

Puerto Madryn është i njohur për praninë e luanëve të detit, ndërsa zona e Punta Lomës është një habitat i rëndësishëm për këto kafshë.

Noti dhe zhytja me maskë pranë luanëve të detit janë ndër aktivitetet turistike që zhvillohen në këtë zonë, duke u dhënë vizitorëve mundësinë t’i vëzhgojnë kafshët në mjedisin e tyre natyror.

Megjithatë, nuk është konfirmuar saktësisht se kur është regjistruar incidenti i veçantë i shfaqur në video.

Luanët e detit njihen për sjelljen e tyre kurioze dhe lozonjare dhe, kur ndodhen në habitatin e tyre natyror, mund t’u afrohen njerëzve që notojnë në zonë.

Pavarësisht pasigurisë rreth datës së regjistrimit, pamjet kanë fituar një vëmendje të madhe në internet, duke e kthyer takimin e pazakontë mes notarit dhe luanëve të detit në një nga videot virale më të komentuara të ditëve të fundit.

Top Channel