Vdes në moshën 36-vjeçare ylli i “Heroes” dhe “Nashville”, Hayden Panettiere/ Mjeku: Aktorja pësoi arrest kardiak

Panettiere u gjet pa ndjenja dhe në arrest kardiak të dielën në një rezidencë në Greenville, Karolina e Jugut, ku qëndronte përkohësisht, bëri të ditur Zyra e Mjekut Ligjor të Qarkut Greenville.

Personeli i urgjencës iu përgjigj një telefonate në 911 për një “arrest kardiak të raportuar”. Mjekët u përpoqën ta ringjallnin, por përpjekjet rezultuan të pasuksesshme. Ajo u shpall e vdekur rreth gjysmë ore pas telefonatës.

Një autopsi e kryer të hënën nuk zbuloi shenja traume që do të kishin kontribuar në vdekjen e saj. Megjithatë, shkaku zyrtar dhe mënyra e vdekjes janë ende në pritje të rezultateve të testeve shtesë. Deri tani, nuk është bërë i ditur një shkak zyrtar i vdekjes.

Sipas policisë së Greenville, telefonata në 911 u bë nga një i njohur i aktores, por nuk janë dhënë detaje të tjera për personin.

“Me trishtim të thellë ndajmë lajmin tragjik për ndarjen nga jeta të Hayden-it tonë të dashur. Ajo ishte një dritë e jashtëzakonshme dhe një forcë e natyrës që u solli dashuri dhe gëzim të pamasë të gjithë atyre që e njihnin – dhe miliona njerëzve që e panë në ekran”, tha babai i saj, Skip Panettiere, në një deklaratë të ndarë nga përfaqësuesi i saj.

Hayden Panettiere lindi më 21 gusht 1989, në Palisades, New York. Karriera e saj nisi kur ishte vetëm 11 muajshe, kur u shfaq në reklama.

Ajo luajti rolin e Lizzie Spaulding në telenovelën e CBS “Guiding Light” nga viti 1996 deri në vitin 2000, ndërsa më pas u shfaq në filma dhe seriale të shumta.

Panettiere u bë e njohur gjerësisht në vitet 2000. Ajo luajti përkrah Denzel Washington në filmin “Remember the Titans” të vitit 2000 dhe më vonë u shfaq në “Ice Princess”, “Bring It On: All or Nothing” dhe “I Love You Beth Cooper”.

Roli që e bëri të famshme në mbarë botën erdhi në serialin e NBC-së “Heroes”, ku ajo interpretoi Claire Bennet, një nxitëse tifozësh me aftësi për t’u shëruar. Seriali u transmetua nga viti 2006 deri në vitin 2010.

Në vitin 2011, Panettiere luajti Kirby Reed në “Scream 4” dhe vite më vonë u rikthye në këtë rol në filmin “Scream VI”.

Një tjetër rol i rëndësishëm ishte ai i Juliette Barnes në serialin muzikor-dramë “Nashville”, ku luajti përkrah Connie Britton nga viti 2012 deri në vitin 2018.

Pas viteve të suksesit në televizion dhe film, Panettiere u tërhoq pjesërisht nga vëmendja publike dhe foli hapur për problemet e saj me varësinë dhe shëndetin mendor.

Më herët këtë vit, ajo publikoi kujtimet e saj me titull “This Is Me A Reckoning”, ku rrëfeu për jetën e saj si yll fëmijësh, depresionin pas lindjes, varësinë, rikuperimin dhe dhunën në familje.

Panettiere kishte folur gjithashtu publikisht për vendimin për t’i lënë kujdestarinë e vajzës së saj, Kaya, ish-partnerit të saj, ish-boksierit profesionist ukrainas Wladimir Klitschko. Ajo kishte thënë se në atë periudhë po përballej me keqpërdorimin e substancave.

Aktorja kishte vetëm një fëmijë, vajzën 11-vjeçare Kaya.

Në vitin 2023, Panettiere humbi edhe vëllain e saj, aktorin Jansen Panettiere, i cili ndërroi jetë në moshën 28-vjeçare nga një zemër e zmadhuar, me komplikime të valvulës aortale.

Ajo foli publikisht për dhimbjen e humbjes së tij dhe për lidhjen e fortë që kishte me të.

“Nuk kishte asgjë në jetën time që të më bënte të ndihesha si humbja e gjysmës time”, kishte thënë ajo në një intervistë atë vit.

Vitet e fundit, Panettiere ishte rikthyer në aktrim, me filma si “Amber Alert” në vitin 2024 dhe “Sleepwalker” në vitin 2026.

SAG-AFTRA shprehu ngushëllimet për “vdekjen e papritur të Hayden Panettiere”, duke kujtuar karrierën e saj të gjatë në televizion dhe film.

Përtej aktrimit dhe këngës, Panettiere ishte e njohur edhe për angazhimin e saj në çështjet e shëndetit mendor, të drejtat e kafshëve dhe çështjet mjedisore.

Ajo kishte mbështetur publikisht edhe Ukrainën pas pushtimit rus në vitin 2022, duke lançuar një fond ndihme për furnizime mjekësore dhe pajisje mbrojtëse për ukrainasit.

Vdekja e saj ka shkaktuar reagime të shumta nga miqtë, kolegët dhe fansat. Bethany Joy Lenz, bashkë-ylli i saj në “Guiding Light”, e përshkroi lajmin si të pabesueshëm, duke kujtuar se Panettiere ishte ende shumë e re dhe se “kishte ende shumë jetë” për të jetuar.

Top Channel