U vodhën në 2025, gjenden 8 vepra të Matisse në Brazil/ Policia zbulon edhe armën mes veprave të artit

Veprat, pjesë e albumit të famshëm “Jazz”, të botuar në vitin 1947, u gjetën gjatë një operacioni policor në një rezidencë në qendër të São Bernardo do Campo, pranë São Paulos. Në pamjet e publikuara nga policia, veprat me ngjyra të gjalla shihen të vendosura mbi një shtrat, ndërsa mes tyre ndodhet edhe një revolver.

Tetë veprat e rikuperuara vlerësohen në rreth 200 mijë dollarë, ose më shumë se 173 mijë euro. Sipas policisë, ato ndodheshin në posedim të një personi të armatosur, i cili dyshohet se po i ruante për organizatorin e vjedhjes.

Në vendngjarje u arrestua një burrë, i cili akuzohet për marrjen e mallrave të vjedhura dhe posedim të paligjshëm të armës së zjarrit. Gjithashtu, një grua që po hetohet për përfshirje në vjedhje u mor në paraburgim.

Gravuras de Matisse roubadas da Biblioteca Mário de Andrade são recuperadas em SP

A Polícia Civil recuperou nesta quinta-feira (13) oito gravuras de Henri Matisse roubadas da Biblioteca Mário de Andrade, no centro de São Paulo, em dezembro de 2025.https://t.co/E0MwZ9Y9C4

— dcmonline (@dcm_noticias) August 14, 2026

Sipas autoriteteve, grupi kishte vepruar në mënyrë të organizuar, duke planifikuar vjedhjen dhe duke ndarë detyrat për grabitjen, ruajtjen dhe shitjen e veprave në tregun e zi.

Ngjarja ndodhi më 7 dhjetor, kur dy persona të armatosur hynë me forcë në bibliotekën Mario de Andrade në São Paulo. Ata mposhtën një roje sigurie dhe një çift të moshuar që po vizitonin ekspozitën, përpara se të merrnin disa prej veprave të ekspozuara.

Në total, u vodhën 13 vepra arti. Përveç tetë veprave të Matisse, grabitësit morën edhe pesë vepra të artistit modernist brazilian Cândido Portinari. Këto të fundit ende nuk janë gjetur dhe policia dyshon se mund të jenë shitur tashmë në tregun e zi.

Njëri prej të dyshuarve u arrestua vetëm një ditë pas grabitjes, pasi u identifikua përmes sistemit të njohjes biometrike dhe teknologjisë së njohjes së fytyrës.

Hetimi vijoi edhe gjatë muajve të mëpasshëm. Në prill, autoritetet arrestuan në Rio de Janeiro personin që dyshohet se ishte organizatori i grabitjes. Ai u kap teksa po përpiqej të korruptonte një roje sigurie për të realizuar një tjetër vjedhje veprash arti.

Në maj, policia zhvilloi gjithashtu disa operacione në vende të lidhura me ankandet dhe tregtinë e veprave të artit në qytete të ndryshme të Brazilit.

Albumi “Jazz” i Henri Matisse, i botuar në Francë në vitin 1947, konsiderohet një vepër e rrallë koleksionimi. Sipas shtëpisë së ankandeve Christie’s, në botë ekzistojnë vetëm rreth 300 kopje, prej të cilave afërsisht 250 janë të firmosura nga vetë artisti.

Rikuperimi i tetë veprave përbën një goditje të rëndësishme ndaj rrjetit të dyshuar për grabitjen dhe tregtimin e paligjshëm të trashëgimisë kulturore në Brazil.

Top Channel