Kthesa e papritur në gjykatë, Luigi Mangione pritet të pranojë fajësinë e vrasjes së CEO-s në Nju Jork

Lajmi është raportuar nga Associated Press, duke cituar një person të informuar për çështjen, i cili ka folur në kushte anonimiteti. Megjithatë, sipas të njëjtit burim, Mangione mund të ndryshojë ende qëndrim.

Mangione, 28 vjeç, akuzohet se udhëtoi drejt Nju Jorkut dhe i ngriti pritë Thompsonit, 50 vjeç, duke e qëlluar për vdekje më 4 dhjetor 2024, jashtë një hoteli në Manhatan, teksa drejtuesi i kompanisë po shkonte në konferencën vjetore të investitorëve të UnitedHealth Group.

Një seancë e papritur është caktuar për të premten në gjykatën federale në Manhatan. Aktualisht nuk është bërë e ditur saktësisht se për cilat akuza do të pranojë fajësinë Mangione, ndërsa bisedimet mes mbrojtjes dhe prokurorëve federalë për një zgjidhje të çështjes kanë vazhduar gjatë javëve të fundit.

Mangione përballet me dy procese të veçanta, një në nivel federal dhe një në shtetin e Nju Jorkut. Në çështjen shtetërore ai akuzohet për vrasjen e Thompsonit dhe gjyqi pritet të nisë më 8 shtator.

Mbrojtja ka argumentuar se ndjekja në të dyja juridiksionet lidhet me të njëjtën ngjarje dhe ka ngritur çështjen e parimit të “double jeopardy”, që ndalon ndjekjen e dyfishtë penale në rrethana të caktuara.

Nëse Mangione pranon fajësinë në çështjen federale, avokatët e tij mund të kërkojnë që akuzat në nivel shtetëror të rrëzohen mbi bazën e këtij parimi. Megjithatë, prokurorët e Nju Jorkut kundërshtojnë këtë argument dhe këmbëngulin se çështja e tyre është e veçantë.

Çështja e Mangiones ka shkaktuar vëmendje të madhe në Shtetet e Bashkuara. Ai u arrestua pesë ditë pas vrasjes në një restorant McDonald’s në Altoona të Pensilvanisë, rreth 370 kilometra larg Manhatanit.

Prokurorët federalë kanë pretenduar se Mangione e kishte planifikuar sulmin dhe se kishte udhëtuar ndërmjet shteteve për ta realizuar atë. Në hetime u gjetën gjithashtu një armë e printuar në 3D dhe një bllok shënimesh, të cilat autoritetet i kanë konsideruar prova të rëndësishme.

Në janar, gjyqtarja federale Margaret Garnett hoqi mundësinë e dënimit me vdekje nga çështja federale, ndërsa lejoi përdorimin e disa provave të sekuestruara gjatë arrestimit.

Nëse deklarata e pritshme e fajësisë bëhet realitet të premten, ajo mund të ketë pasoja të rëndësishme jo vetëm për çështjen federale, por edhe për gjyqin e planifikuar në Nju Jork. Megjithatë, deri tani nuk ka një deklarim zyrtar të fajësisë dhe marrëveshja mund të ndryshojë ose të dështojë para seancës.

Top Channel