“Pas dy vitesh do të jesh kryeministër”/ Si projektonte Latiova të ardhmen politike të Ranuccit dhe çfarë fshihet pas atentatit të gazetarit italian

Më 16 tetor 2025, një bombë shpërtheu pranë banesës së tij në Pomezia, duke dëmtuar rëndë makinën e gazetarit dhe automjetin e vajzës së tij. Ranucci dhe familjarët e tij nuk u plagosën.

Pas hetimeve, autoritetet italiane arrestuan Valter Lavitolën, i cili akuzohet se ishte porositësi i atentatit. Në të njëjtën çështje është përfshirë edhe Gomes Clesio Tavares, ndërsa katër persona të tjerë dyshohen si autorë të sulmit.

Sipas dokumenteve të hetimit, një nga elementet kryesore që po shqyrtohet për motivin është pikërisht marrëdhënia mes Lavitolës dhe Ranuccit dhe plani që i pari kishte ndërtuar për të ardhmen politike të gazetarit.

Valter Lavitola, i njohur si “miku” i Ranuccit, kishte ambicie të mëdha për të ardhmen e tij dhe po projektonte një rol të rëndësishëm në institucionet italiane, duke u mbështetur te ideja se gazetari mund të bëhej një figurë e fuqishme politike.

Sipas dokumenteve të hetimit, Lavitola besonte se Ranucci mund të merrte rreth 30% të votave edhe pa një parti politike pas tij.

“Vëlla, ai do të ishte president 110% i garantuar”, kishte thënë Lavitola në një bisedë, ndërsa në një mesazh drejtuar Ranuccit shkruante: “Pas dy vitesh do të jesh kryeministër”.

Sipas hetuesve, Lavitola e imagjinonte veten si këshilltar dhe “spin doctor” të gazetarit dhe besonte se suksesi politik i Ranuccit mund t’i siguronte edhe atij një rol të rëndësishëm në të ardhmen.

Në fillim, Ranucci nuk dukej se e merrte seriozisht idenë e kandidimit politik. Megjithatë, sipas gjyqtares së hetimit paraprak, me kalimin e kohës ai u bë gjithnjë e më kurioz dhe i hapur ndaj propozimit të Lavitolës.

Sipas dokumenteve, Ranucci nuk e kishte mbështetur zyrtarisht projektin, por sjellja dhe mesazhet e tij tregonin një “qëndrim hapjeje” ose të paktën interes ndaj një kandidature që po bëhej gjithnjë e më konkrete.

Hetuesit besojnë se Lavitola e kishte përsëritur këtë ide vazhdimisht që prej vitit 2024, duke ndikuar gradualisht te gazetari.

“Gazetari ishte viktimë e manipulimit të të dyshuarit”, thuhet në dokumentet e hetimit, ku theksohet edhe lidhja e fortë që ishte krijuar mes tyre.

Sipas vlerësimit të gjyqtares, qëllimi i Lavitolës mund të ketë qenë pikërisht rritja e popullaritetit të Ranuccit për ta ndihmuar në ngjitjen e tij politike.

Lavitola nuk u mjaftua vetëm me bisedat me Ranuccin. Sipas hetimeve, ai porositi edhe sondazhe për të testuar mundësinë e një kandidature politike të gazetarit.

Sondazhet u shqyrtuan edhe nga gazetarë me përvojë në këtë fushë, mes tyre Stefano Cappellini dhe Paolo Mieli.

Një nga pyetjet ishte nëse votuesit do të mbështesnin një kandidat të tretë përballë Elly Schlein dhe Giuseppe Conte dhe nëse ky kandidat do të duhej të ishte politikan apo një figurë e shoqërisë civile.

Në këtë mënyrë, sipas hetuesve, po testohej edhe mundësia që Ranucci të hynte në politikë.

Roli i Gomes Clesio Tavares dhe katër të arrestuarve

Në hetim përmendet edhe Gomes Clesio Tavares, i cili dyshohet se rekrutoi katër persona për të kryer atentatin: Antonio Passariello, Pellegrino D’Avino, Saverio Mutone dhe Marika De Filippis.

Sipas hetuesve, Tavares u premtoi atyre para dhe ndihmë në rast se do të kishin probleme me drejtësinë.

Pas arrestimeve, përgjimet e kryera në burg, sipas hetuesve, zbuluan biseda që lidhnin Tavaresin dhe Lavitolën me një plan të mëtejshëm.

Në një prej bisedave të përgjuara, njëri prej të arrestuarve i thotë bashkëpunëtorit: “Saverio, hajde të hipim në makinë dhe të shkojmë në shtëpinë e atij që na ka borxh paratë”, duke iu referuar Tavaresit.

Hetuesit dyshojnë gjithashtu se Lavitola është përpjekur të devijojë hetimin pas atentatit.

Sipas dokumenteve, ai kontaktoi gazetarin e Report, Daniele Autieri, dhe i paraqiti pista të tjera për autorët e mundshëm të sulmit. Mes tyre ishte edhe pretendimi për një komplot të përbashkët mes shërbimeve italiane dhe izraelite për eliminimin e Ranuccit.

Autieri më vonë deklaroi se afrimin e Lavitolës me të e konsideronte një “mashtrim të mundshëm”.

Për gjyqtaren e hetimit, dyshimet janë edhe më të forta. Sipas saj, të dyshuarit kanë tentuar vazhdimisht të ndikojnë në strategjinë e mbrojtjes së personave të akuzuar si ekzekutorë të atentatit.

Për këtë arsye, gjyqtarja vlerëson se ekziston rreziku i manipulimit të provave dhe i përsëritjes së veprës penale.

Lavitola, ndërkohë, duket se e kishte parashikuar edhe mundësinë e arrestimit të tij. Ai i kishte thënë një mikeshe portugeze se mund të arrestohej së shpejti.

“Ka të gjitha mundësitë që të arrestohem. Por është shumë e pamundur që të arrestohem për një kohë të gjatë”, kishte deklaruar ai.

Kështu, hetimi po përpiqet të zbardhë jo vetëm autorët e atentatit, por edhe motivin pas tij dhe nëse projekti politik i Lavitolës për Ranuccin ishte elementi që e shtyu atë të organizonte sulmin. Sipas akuzës së re, qëllimi nuk ishte vrasja e gazetarit, por rritja e popullaritetit të tij dhe përshpejtimi i projektit të tij politik.

Sipas dokumenteve të hetimit, Lavitola besonte se Ranucci kishte potencial të madh elektoral dhe mund të bëhej një figurë e rëndësishme politike në Itali.

Lavitola, i dënuar më parë për zhvatje dhe vepra të tjera, mendonte edhe për rolin që mund të kishte vetë në këtë skenar. Ai e imagjinonte veten si këshilltar dhe “spin doctor” të Ranuccit, nëse ky i fundit do të hynte në politikë dhe do të arrinte poste të larta.

Top Channel