Më shumë se 38 vite mister/ Arrestohet 70-vjeçari që rrëfeu vrasjen e një 20-vjeçareje në Florida

20-vjeçarja u gjet e pajetë në dhomën e saj të gjumit në Jacksonville të Floridës, ndërsa vajza e saj vetëm 13 muajshe ndodhej në shtëpi dhe qante në dhomën e ndenjes.

Tani, më shumë se 38 vite pas krimit, çështja ka marrë një kthesë të papritur. Një 70-vjeçar nga Florida, Gary Glowacz, ka rrëfyer se ishte përgjegjës për vdekjen e Melissa Ellison dhe është arrestuar për vrasje të shkallës së dytë dhe vjedhje me thyerje dhe sulm të armatosur dhe dhunë fizike.

Më 8 korrik, Glowacz telefonoi Zyrën e Sherifit të Qarkut Clay dhe u tha autoriteteve se donte të “rregullonte gjërat” për vdekjen e 20-vjeçares. Sipas raportit të arrestimit, ai u tha detektivëve se në vitin 1987 kishte hyrë në shtëpinë e saj për të kërkuar para ose sende që mund t’i shiste për të blerë drogë.

Glowacz u tha hetuesve se në mars të këtij viti kishte lexuar një artikull për vrasjen e Melissa Ellison dhe kuptoi se ishte përgjegjës për vdekjen e saj.

Çfarë ndodhi natën e 28 dhjetorit 1987?

Melissa Ellison, e njohur si Missy Taylor nga familja dhe miqtë e saj, u gjet e vdekur më 28 dhjetor 1987 nga dy shoqet e saj të dhomës.

Sipas raportit të arrestimit, mjeku ligjor e cilësoi vdekjen si vrasje dhe përcaktoi se shkaku ishte një traumë në kokë e shkaktuar nga një objekt i fortë.

Glowacz, i cili në atë kohë ishte 31 vjeç dhe jetonte rreth gjysmë milje larg shtëpisë së Melissa-s, u tha detektivëve se kishte hyrë me forcë përmes një dritareje.

Ai hyri në dhomën e gjumit dhe gjeti Melissa-n të shtrirë në shtrat me vajzën e saj 13-muajshe, Casie. Sipas rrëfimit të tij, ai mori një trung druri që ndodhej në shtëpi dhe e goditi një herë në kokë.

Më pas, ai mori vajzën e vogël, e vendosi në divanin e dhomës së ndenjes dhe u kthye në dhomën e gjumit për të kërkuar para nën dyshekun e viktimës.

Detektivët vunë në dukje se Glowacz tregoi detaje të vendit të krimit që nuk ishin bërë publike dhe nuk ndodheshin në artikullin që ai kishte lexuar më herët këtë vit. Gjatë hetimit fillestar të vrasjes së Melissa Ellison nuk ishte bërë asnjë arrest.

Vajza e saj u përball me të vërtetën pas 38 vitesh

Për Casie Ellison, e cila ishte vetëm 13 muajshe kur nëna e saj u vra, lajmi për arrestimin erdhi pas një jete të tërë të kaluar pa përgjigje.

Për vite me radhë, Casie tha se ishte përpjekur t’i shtynte mënjanë emocionet dhe dhimbjen për vdekjen e nënës së saj. Rreth 25 vite pas vrasjes, ndjenjat u rikthyen fuqishëm kur kuptoi se vajza e saj kishte arritur të njëjtën moshë që ajo kishte kur humbi nënën.

“Më duhej vetëm të kuptoja se kjo është Casie e vogël. Po shihja veten time”, tha ajo.

Pas arrestimit të Glowacz, telefonata e parë që detektivët bënë ishte për Casie-n. Më pas ata telefonuan edhe hallat e saj, Glenda Blandford dhe Sissy Bennett, të cilat ishin përkatësisht 17 dhe 15 vjeç kur motra e tyre u vra.

Familja kishte kaluar dekada duke kërkuar përgjigje. Prindërit e Melissa-s ndiqnin çdo pistë të mundshme dhe shkonin vazhdimisht në zyrën e sherifit, por pa sukses.

Në vitin 2019, nëna e Melissa-s, Catherine Taylor, vdiq pa mësuar se çfarë kishte ndodhur natën kur vajza e saj u vra.

Një mik i Sissy Bennett ia paraqiti rastin organizatës jofitimprurëse Project: Cold Case, e cila mbështet familjet e viktimave të vrasjeve të pazgjidhura.

Në janar të vitit 2026, familja Ellison dhe Project: Cold Case morën pjesë në një konferencë për shtyp së bashku me First Coast Crime Stoppers, duke bërë apel për informacion që mund të ndihmonte në zbardhjen e vrasjes.

“Dikush e di saktësisht se çfarë ndodhi atë natë. Dikush kujton një detaj që nuk është thënë kurrë”, tha Casie Ellison në atë kohë.

Zyra e Sherifit të Jacksonville tha se konferenca ndihmoi në hetim dhe se disa informacione të reja luajtën rol në arrestimin e Glowacz.

Pas arrestimit, Sherifi TK Waters deklaroi se, megjithëse ndalimi i të dyshuarit nuk mund të mbushë boshllëkun e lënë në zemrat e familjarëve të Melissa-s, ai mund të jetë një hap drejt shërimit.

Për familjen e Melissa-s, arrestimi nuk nënkupton ende fundin e historisë.

Hallat e saj dhe vajza e saj thonë se dhimbja ka qenë e pranishme gjatë gjithë këtyre viteve. Familja ka humbur edhe tre të afërm të tjerë që nga vdekja e Melissa-s.

Casie tashmë ka tre fëmijë dhe thotë se nëna e saj vazhdon të jetojë përmes kujtimeve dhe familjes që ajo ka krijuar.

Familjarët e kujtojnë Missy-n si një vajzë që e donte shumë plazhin. Ajo është përkujtuar edhe përmes një Jeep Wrangler-i vjollcë, të blerë nga motra e saj Sissy për shkak të këngës së preferuar të Melissa-s, “Purple Rain” nga Prince.

Familja kishte planifikuar një festë përkujtimore për Melissa-n përpara se të mësonte për arrestimin. Festa do të zhvillohet gjithsesi, por tashmë me një ndjesi të re.

“Ne ende lutemi për drejtësi”, tha Glenda Blandford. “Ne lutemi dhe përgjërohemi që Zoti të hedhë dritë mbi këtë rast dhe t’u japë udhëzime të gjithë detektivëve, që ky rast të marrë drejtësinë e duhur, sepse tani për tani po flasim për një arrestim, jo për drejtësi.”

Top Channel