Akses i shpejtë në postimet e Truth Social, mbi 10 firma paguajnë deri në 100 mijë dollarë në muaj tarifë

Për këtë akses, firmat kryesisht të tregtimit me frekuencë të lartë paguajnë deri në 100 mijë dollarë në muaj. Shërbimi, i quajtur Truth API, u lançua në fillim të gushtit dhe synon t’u japë klientëve një avantazh kohor duke u mundësuar të shohin postimet nga llogaritë më me ndikim në Truth Social përpara se ato të përhapen gjerësisht në treg.

Drejtori ekzekutiv i përkohshëm i kompanisë, Kevin McGurn, tha se klientët aktualë paguajnë nga 60 mijë deri në 100 mijë dollarë në muaj për këtë shërbim.

Trump Media pret që Truth API të shndërrohet në një burim të ri dhe të qëndrueshëm të ardhurash. Kompania ka deklaruar se shërbimi mund të bëhet një komponent i rëndësishëm i strategjisë së saj të biznesit, krahas reklamave dhe aseteve dixhitale.

McGurn tha gjithashtu se kompania po shqyrton mundësi të tjera bashkëpunimi me firmat e teknologjisë, organizatat mediatike dhe tregjet e basteve.

Shërbimi u njoftua në korrik, kur Trump Media deklaroi se do t’u ofronte firmave të Wall Street-it dhe investitorëve institucionalë akses më të shpejtë në postimet e Truth Social. Presidenti amerikan Donald Trump përdor shpesh platformën për të bërë deklarata dhe njoftime që mund të ndikojnë në tregje.

Modeli i ri i biznesit ka ngritur pyetje ligjore dhe etike, veçanërisht për faktin se postimet e Trump mund të ndikojnë në çmimet e aksioneve dhe aseteve të tjera financiare.

Debati lidhet edhe me strukturën e pronësisë së kompanisë, ku familja e presidentit Trump mbetet aksionari kryesor. Kritikët mund të vënë në pikëpyetje nëse është e përshtatshme që një kompani e lidhur ngushtë me familjen e presidentit të gjenerojë të ardhura duke u dhënë firmave financiare akses të privilegjuar në deklaratat e tij publike.

Lajmi për Truth API vjen në një periudhë të vështirë financiare për Trump Media. Kompania raportoi një humbje prej 238 milionë dollarësh gjatë periudhës prill–qershor, më shumë se dhjetë herë më e lartë se humbja e regjistruar në të njëjtën periudhë të vitit të kaluar.

Pavarësisht humbjes së madhe, të ardhurat e kompanisë arritën në 1.7 milionë dollarë, një rritje prej 89% krahasuar me të njëjtën periudhë të një viti më parë.

Trump Media deklaroi gjithashtu se e mbylli tremujorin e dytë me rreth 2 miliardë dollarë në asete, ndërsa asetet financiare arrinin në afërsisht 1.9 miliardë dollarë, duke përfshirë para të gatshme, investime afatshkurtra dhe monedha digjitale.

Top Channel