Italia digjet nga i nxehti ekstrem/ Temperaturat shkojnë deri në 40 gradë Celsius, humbin jetën tre persona

Pas një përmirësimi të përkohshëm të situatës, temperaturat pritet të rriten sërish në pjesën më të madhe të vendit. Ajri më i freskët që kaloi Alpet gjatë fundjavës uli përkohësisht numrin e qyteteve në alarm të kuq, por situata po përkeqësohet përsëri.

Nga qytetet që dje ishin në nivelin e alarmit të verdhë, pesë janë rikthyer sot në nivelin portokalli. Vetëm Kaljari dhe Torino vijojnë të jenë në nivelin e para-alarmit.

Sipas meteorologut Mattia Gussoni, temperaturat do të rikthehen në nivele shumë të larta, me maksimume prej 36-38°C në shumë zona të Italisë qendrore dhe veriore, si dhe në ishujt kryesorë.

Ekspertët e konsiderojnë këtë situatë si një tjetër dëshmi të zgjatjes së valës së të nxehtit që ka prekur Italinë prej javësh. Prania e vazhdueshme e anticiklonit afrikan po sjell temperatura të larta, por edhe kushte të vështira për shkak të lagështisë së madhe.

Në Liguri, për shembull, matjet meteorologjike kanë regjistruar nivele jashtëzakonisht të larta lagështie: deri në 97% në Pieve di Teco dhe 95% në Camogli.

Kombinimi i temperaturave të larta me lagështinë e madhe bën që temperaturat të perceptohen edhe më të larta nga trupi i njeriut.

Situata është shoqëruar edhe me viktima. Sipas raportimeve, tre persona kanë humbur jetën ndërsa ndodheshin në plazh, mes tyre një grua 68-vjeçare në zonën e Salernos, një 80-vjeçar në Ansedonia dhe një 61-vjeçar në Liguri.

Vala e të nxehtit ka shtuar gjithashtu rrezikun për zjarre. Përpjekjet për shuarjen e flakëve në zonën e Gorizias vijojnë, ndërsa zjarre të tjera janë raportuar në Toskanë, përfshirë Massa Marittima në provincën e Grossetos dhe Anghiari në zonën e Arezzos.

Ndërkohë, temperaturat ekstreme po krijojnë edhe kushte të favorshme për zhvillimin e fenomeneve të forta atmosferike.

Pas temperaturave që në disa zona, përfshirë Firencen, kanë kaluar 40°C, meteorologët paralajmërojnë për një rritje të paqëndrueshmërisë atmosferike.

Rrymat më të freskëta në lartësi, në kombinim me nxehtësinë e akumuluar në tokë, mund të shkaktojnë stuhi të fuqishme, breshër dhe rryma të forta zbritëse të ajrit, të cilat mund të shoqërohen me erëra të dhunshme.

Sipas parashikimeve, stuhitë do të intensifikohen gjatë ditës së nesërme, veçanërisht në veri të Italisë, por edhe në zonat e brendshme të Apenineve në Italinë qendrore dhe jugore. Rreziku kryesor pritet të jetë breshëri.

Një tjetër fenomen i pazakontë është regjistruar në Puglia, në zonën e Foggias. Një vorbull e njohur si “Djalli i Rërës” u formua në Zapponeta dhe u filmua nga drejtues automjetesh përgjatë një rruge provinciale.

Meteorologët shpjegojnë se fenomeni lidhet me ngrohjen e fortë të sipërfaqes së tokës. Diferencat e mëdha të temperaturës krijojnë rryma vertikale të ajrit, duke formuar vorbulla që mund të zgjasin nga disa minuta deri në rreth 20 minuta.

Pavarësisht pamjes së pazakontë, ekspertët thonë se një fenomen i tillë mund të shfaqet edhe në kushtet e nxehtësisë ekstreme në Mesdhe.

Parashikimet tregojnë se shirat dhe stuhitë do të shtohen gjatë ditës së nesërme, ndërsa nga e mërkura vala e nxehtësisë pritet të rikthehet me forcë, duke sjellë sërish temperatura shumë të larta në pjesën më të madhe të Italisë.

Top Channel