“Nuk e përballon më presionin”/ Ariana Grande largohet nga jeta publike, anulon edhe projektin e madh në Londër

Sipas një përfaqësuesi të artistes për revistën People, Grande do të “bëjë një hap pas nga ekspozimi publik”, pasi vitet e fundit është përballur me “vëzhgim dhe kritika të pandërprera” nga publiku dhe mediat.

Si pasojë e këtij vendimi, 33-vjeçarja nuk do të interpretojë më në ringjalljen e muzikalit të njohur të Stephen Sondheim, “Sunday in the Park with George”, që ishte planifikuar të vihej në skenë në teatrin Barbican të Londrës në vitin 2027.

Kompania Empire Street Productions, e cila organizon shfaqjen, konfirmoi largimin e Grande nga projekti, duke theksuar se e respekton plotësisht vendimin e saj.

“Ne e dimë se ky nuk ka qenë një vendim i lehtë dhe e mbështesim plotësisht. I urojmë vetëm më të mirat,” thuhet në deklaratën e kompanisë.

Në muajt e fundit, Ariana Grande ka qenë shpesh në qendër të diskutimeve për pamjen e saj fizike dhe shëndetin, veçanërisht pas publikimit të albumit të saj më të ri “Petal”.

Në videoklipin e këngës promovuese, artistja interpreton rolin e një këngëtareje që përballet vazhdimisht me kritika në audicione, ku i thuhet se “nuk është mjaftueshëm e mirë”, se “duhet të bëjë ndërhyrje estetike”, e më pas se “ka bërë tepër ndërhyrje”. Në fund të videos, personazhi i saj përballet simbolikisht me kritikët.

Përfaqësuesi i saj theksoi se Grande dëshiron ta mbyllë turneun “e shëndetshme dhe e lumtur”, përpara se të marrë një pushim të merituar nga aktivitetet publike.

Ndërkohë, fansat kanë reaguar me mbështetje të madhe në rrjetet sociale, ku hashtag-u #WeLoveYouAriana është bërë trend.

Turneu i artistes vazhdon me koncertet në Çikago dhe më pas në Londër, ku ajo do të mbajë dhjetë shfaqje në arenën O2, përpara se ta mbyllë zyrtarisht turneun më 1 shtator. Zëvendësuesi i saj në muzikalin londinez ende nuk është bërë i ditur.

Top Channel