Një ditë pas përfundimit të Kupës së Botës 2026, ka ardhur njoftimi i parë i rëndësishëm nga pankinat e kombëtareve. Rudi Garcia nuk do të vazhdojë të jetë trajneri i Belgjikës.
Tekniku largohet nga posti i tij pasi i udhëhoqi “Djajtë e Kuq” deri në çerekfinalet e turneut, ku u mposhtën ngushtë 2-1 nga Spanja, skuadra që më pas u shpall kampione e botës. Vendimi u zyrtarizua të hënën nëpërmjet një komunikate nga Federata Belge e Futbollit (RBFA).”Rudi Garcia dhe Federata Belge e Futbollit nuk do ta zgjasin kontratën që është e vlefshme deri më 31 korrik 2026,” – thuhej në deklaratën zyrtare.
Bilanci i Garcias me Belgjikën
Rudi Garcia mori drejtimin e ekipit më 1 shkurt 2025, duke pasuar në këtë detyrë Domenico Tedesco-n. Gjatë aventurës së tij 18-mujore, tekniku arriti objektiva të rëndësishëm: siguroi qëndrimin e belgëve në Ligën A të UEFA Nations League dhe i kualifikoi ata me sukses në Kupën e Botës FIFA 2026, duke i pozicionuar sërish mes elitës së futbollit ndërkombëtar.
Fjalët e lamtumirës
Në lidhje me largimin e tij, trajneri u shpreh krenar për punën e bërë dhe procesin e rinovimit të skuadrës:”Pas diskutimeve me RBFA-në, kemi vendosur të mos e zgjasim udhëtimin e shkëlqyer që kemi ndarë gjatë 18 muajve të fundit. E lë Belgjikën në Ligën A të Ligës së Kombeve të UEFA-s dhe midis tetë ekipeve më të mira në botë.”
Në fund, Garcia nuk harroi të falënderonte ata që e shoqëruan në këtë rrugëtim:”Dua të falënderoj grupin tim të shkëlqyer të lojtarëve, drejtorin sportiv Vincent Mannaert dhe tifozët që na mbështetën gjatë gjithë kësaj Kupe Bote. I uroj Belgjikës çdo sukses në vazhdimin e tranzicionit gjenerativ, të cilin isha krenar ta ndihmoja ta nisja.” Tashmë, Belgjika nis zyrtarisht kërkimin për një “timonier” të ri për të vazhduar projektin e rinovimit të kombëtares.
Top Channel
