Sulmet me dronë në Ukrainë, humb jetën gazetari francez 03/10 21:24
Në qytetin e lindjes së Pablo Escobarit, Medellín, droga tregtohet hapur mes trafikut të ngarkuar dhe turmave të kalimtarëve.
Gazetarët e Sky News dokumentojnë realitetin tronditës të një tregu të paligjshëm që funksionon përpara syve të të gjithëve.
Në një lagje famëkeqe të Medellin-it, vetura ndalojnë njëra pas tjetrës, ndërsa tregtarët në rrugë thërrasin:“Kokainë! Pilula! Ekstazi! Tusi!” Për çdo blerës në makinë apo në këmbë, ka shpërndarës të gatshëm me motoçikleta, të cilët dorëzojnë porositë në apartamente luksoze, klube nate dhe shtëpi private.
Në këtë “treg të hapur droge”, sinjalet me fishkëllima përdoren për të komunikuar mes vëzhguesve dhe shitësve. Dy fishkëllima nënkuptojnë se gjithçka është e qetë, ndërsa një e vetme paralajmëron për praninë e policisë.
Pranë këtij realiteti të zymtë, njerëzit përpiqen të vazhdojnë jetën e tyre normale. Në një kafene aty pranë, një familje festonte 70-vjetorin e një të afërmeje, ndërsa përreth tyre zhvillohej pa ndrojtje tregtia e drogës. Në këtë zonë, tregu i drogës funksionon 24 orë në ditë, përkrah restoranteve, kafeneve dhe dyqaneve të zakonshme.
Kolumbia mbetet sinonim i prodhimit dhe trafikut të kokainës, një reputacion i trashëguar që nga koha e Pablo Escobarit, i cili sot vazhdon të adhurohet nga një pjesë e popullatës përmes posterëve, suvenireve dhe tureve turistike në varrin e tij.
Pavarësisht përpjekjeve të autoriteteve për të luftuar kartelet, një pjesë e shoqërisë mbetet e lidhur ngushtë me industrinë e drogës, jo për përfitim të madh, por për mbijetesë. Në një tjetër pjesë të reportazhit, gazetarët udhëtuan thellë në Amazonë, në kufi me Perunë, për të vizituar një plantacion të fshehur të kokës, bima nga e cila prodhohet kokaina.
Pas një udhëtimi mbi 5 orë me varkë dhe një ecjeje të lodhshme në pyll, ata mbërritën në një plantacion tetë hektarësh të mbuluar me bimë kokaine. Fermeri lokal, i cili jeton me frikën e arrestimit, shpjegon se për 70 gramë kokainë duhen 30 kilogramë gjethe, për të cilat ai paguhet vetëm 7 dollarë. “Është e vetmja mënyrë për të ushqyer familjen time”, thotë ai.
Ai pranon se prodhimi i paligjshëm nuk është i mirë për komunitetin, por shton se njerëzit shpesh janë të detyruar të bëjnë sakrifica për të mbijetuar.
“Nuk mund të thuash se kjo është e mirë për këdo, jo, kjo dëmton të gjithë. Por të gjithë përpiqemi të gjejmë rrugën tonë.”
Përkundër përpjekjeve ndërkombëtare, përfshirë ofensivën e administratës së ish-Presidentit Donald Trump kundër karteleve në Amerikën Latine, përfshirë Kolumbinë dhe Venezuelën, tregu i drogës mbetet i fuqishëm dhe i motivuar nga kërkesa globale, veçanërisht nga SHBA dhe Europa.
Në fund të fundit, problemi nuk është vetëm prodhuesi, është edhe konsumatori. Për aq kohë sa ekziston kërkesa, do të ketë edhe ofertë. Dhe për fermerët e varfër në Kolumbi, koka mbetet mjeti i vetëm për të siguruar jetesën, pavarësisht kostos morale apo ligjore.
Top Channel
