“Ulje drastike e taksave”/ Meta: Premtimet e opozitës realizohen me paratë që Rama i vjedh Buxhetit të Shtetit

Ilir Meta: Këmbanat po bien për regjimin, që as ujë të pijshëm 24 orë nuk arriti dot në tre mandate t’u garantonte shqiptarëve, të etur sot jo vetëm për ujë, por më shumë se kurrë për Liri, të drejta dhe dinjitet njerëzor.

Uji i gamiles së “Rilindjes” po shteron, bashkë me premtimet elektorale që Edi Rama i pati në dorë t’i realizonte por nuk i mbajti dhe as i përmbushi kurrë.

Qeveria që 12 vite më parë premtoi diell për të gjithë shqiptarët, e mbyll mandatin e tretë si terri më i errët dhe ferri më përvëlues për Shqipërinë.

Njësoj si rangallat gjigande dhe të ndryshkura të TEC-eve lundruese të Vlorës, që Edi Rama i mori për të garantuar furnizimin pa kufizim me energji elektrike, por që as 1 kë nuk prodhuan dhe as kanë për të prodhuar kurrë.

Kryeministri që u mbylli dyert e shtëpive 1 milion shqiptarëve duke i dëbuar në emigrim, premton sot të na hapë dyert e BE-së me pasaportën europiane.

Flet për paqen globale, për luftën në Ukrainë dhe konfliktet në Lindjen e Mesme, Kryeministri që nuk garanton dot rendin dhe qetësinë publike jo në lagjet, por as në zemrat e qyteteve të Shqipërisë ku bandat çdo ditë bëjnë kërdinë dhe ku fëmijë therren me thikë në shkolla në mes të Tiranës.

Ky Kryeministër që në 12 vite nuk arriti dot t’u japë fund radhëve torturuese në spitale, hipoteka dhe gjykata, pretendon sot t’u japë fund radhëve të shqiptarëve në aeroportet e Europës.

Shampanjat e festimit të integrimit europian dhe dekorimet qesharake të ambasadorëve janë bërë njësoj si kapitujt me BE-në, që vetëm hapen por që nuk dihet se kur do të mbyllen.

Nuk mund të durohet më një Qeveri që flet për anije kozmike në vendin ku fëmijët me kancer humbin jetën për mungesë barnash në spitale dhe ku një shishe verë që pi në ditë Kryeministri i vendit më të varfër në Europë është e barabartë me 14 vite pension minal.

A mund të besosh më se të mbron shëndetin një Qeveri që nxorri tanket në rrugë për të luftuar me COVID-in dhe që sot të detyron të paguash 60% më shtrenjtë shëndetësinë që ta premtoi falas?

Nuk mund të pranojmë më një pushtet që mbron të fortët dhe shkel të dobëtit.

Një pushtet që jep leje ndërtimi për kulla luksi e droge për pakicën dhe që rrëmben e rrënon pronat e ligjshme për shumicën, duke mos kursyer as helmimin me gaz të grave shtatzëna, të miturve dhe të moshuarve.

Legalizimet falas brenda mandatit të parë ishin fjalë që i mori era.

Këto ndodhin sepse në 12 vite Edi Rama bëri ligje vetëm për veten dhe padrejtësi për popullin.

Është ai që vrau shpresën dhe ëndrrat e të rinjve duke hapur plagën e shpopullimit si një humnerë të thellë në trupat e qytetet dhe fshatrave të Shqipërisë, ku sot nuk ka më jetë.

Është Edi Rama ai që piu gjakun e familjeve të thjeshta shqiptare, që pështyu mundin dhe djersën e fermerit shqiptar, që mohoi kontributet dhe sakrificat e panumërta të pensionistëve duke u ushqyer me taksat e tyre, të popullit me nivelin më mizerabël të varfërisë në kontinent.

Ndaj jemi sot kampion në Europë për korrupsion dhe të dytët në botë për ryshfet.

Edi Rama rriti taksat dhe borxhin publik, jo për të rritur mirëqenien e shqiptarëve, por t’u ushqyer me hajdutërinë skizofrenike, me mijëra tendera sekrete, me PPP, me rrugë të florinjta që ose shemben pa u inauguruar ose që kushtojnë deri 6 herë më shtrenjtë se në BE, me klientelizëm dhe padrejtësi, nga mëngjesi në darkë, aq sa sot një bebe e porsalindur e ka në kokën e krevatit një faturë borxhi që duhej të paguajë prej 5,634 euro për banor.

Si të mos mjaftohej, ky Kryeministër që shtron iftare, citon librat e shenjtë në kisha dhe teqe, është në fakt Kryehajduti më i madh i pronave të komuniteteve fetare, që në shtëpitë dhe tokat e Zotit jep leje për të ndërtuar rezorte luksoze, kazino dhe kuplara për klientët e tij.

Falë tij sot kemi jo vetëm fëmijë në masë analfabetë funksionalë por edhe me kreativitetin më të ulët, për shkak se dija nënfinacohet ndërsa injoranca dhe vesi lartësohen, deri duke hyrë në Parlament dhe bashkitë e vendit.

Ndaj lugati është mbyllur sot në bunker.

Larg popullit, larg gazetarëve, larg interpelancave, larg transparencës e llogaridhënies dhe larg së vërtetës, se pasi hëngri partinë e tij dhe gëlltiti pasuritë e Shqipërisë, nisi të hajë të vetët dhe tani po ha edhe veten e vet “Sy m’sy”.

Fitorja është më pranë se kurrë!

Edhe 35 ditë na ndajnë nga epoka e re që fillon më 11 Maj, falë fuqisë së votës tuaj dhe të çdo shqiptari të ndershëm, për të kurorëzuar së bashku triumfin e Lirisë mbi Tiraninë, të patriotizmit mbi antishqiptarinë, të fitores së programit tonë mbi pushtetin, të Fitores Madhështore të Shqipërisë, që prodhon dhe eksporton, që hap mijëra vende të reja pune dhe që rrit mirëqenien për të gjithë shqiptarët.

Top Channel