“Nëse nuk më përgjigjeni mua, do i përgjigjeni atij nga Washingtoni”, Sekretari i Përgjithshëm i NATO-s i bën thirrje shteteve evropiane për rritjen e shpenzimeve të mbrojtjes 20/02 19:16
Bisedimet mes SHBA-së dhe Rusisë kanë filluar tashmë në Riad, raporton Reuters.
Palët janë ulur përballë njera-tjetrës dhe pas një pushimi rreth 15 minutësh, kanë rinisur bisedimet. Por cilët janë pjesëmarrësit në tryezën SHBA-Rusi?
NGA SHBA
I dërguari i SHBA-së për Lindjen e Mesme, Steve Witkoff (majtas)
Një investitor në fushën e pasurive të paluajtshme në Nju Jork, i cili e njeh Donald Trumpin prej dekadash dhe tani është në qendër të ekipit të tij të politikës së jashtme. Witkoff ka meritën për presionin ndaj liderit izraelit, Benjamin Netanyahu, për të pranuar një marrëveshje armëpushimi në Gaza.
Sekretari i Shtetit i SHBA-së, Marco Rubio (i dyti nga e majta)
Dikur një kritik i ashpër i Donald Trumpit, Rubio është bërë një nga aleatët e tij më të ngushtë, duke bërë histori si latini i parë që shërben si kryediplomat i SHBA-së.
53-vjeçari, ish-senator i Floridës, ka mbajtur një qëndrim të ashpër ndaj Kinës dhe Iranit, ndërsa ka kundërshtuar financimin shtesë për Ukrainën.
Këshilltari i Sigurisë Kombëtare të SHBA-së, Mike Waltz (i treti nga e majta)
Një veteran lufte i dekoruar dhe kongresmen për tre-mandate nga Florida, Michael Waltz ka qenë një mbështetës i palëkundur i Donald Trumpit që në presidencën e tij të parë.
I njohur për qëndrimin e tij të ashpër ndaj Kinës dhe Iranit, Waltz ka shërbyer gjithashtu si këshilltar për disa administrata republikane.
RUSIA:
Ministri i Jashtëm i Rusisë, Sergei Lavrov (djathtas)
Një veteran i diplomacisë ruse, Sergei Lavrov ka shërbyer si ministër i jashtëm i vendit për më shumë se dy dekada. Gjatë karrierës së tij, ai ka qenë një kritik i ashpër i ndërhyrjes perëndimore në punët e vendeve të tjera dhe një kundërshtar i vendosur i vlerave liberale. Megjithatë, ndikimi i tij i vërtetë mbi Putinin mbetet një çështje e debatueshme.
Këshilltari kryesor për politikën e jashtme i Rusisë, Yuri Ushakov (i dyti nga e djathta)
77-vjeçari Ushakov ka qenë këshilltari kryesor i Putinit për politikën e jashtme për më shumë se një dekadë, por ka qëndruar kryesisht në prapaskenë.
Më parë, ai ka shërbyer si ambasador i Rusisë në SHBA nga viti 1998 deri në 2008, duke fituar përvojë të vlefshme në negociatat me Uashingtonin.
MIKPRITËSIT:
Ministri i Jashtëm i Arabisë Saudite, Princi Faisal bin Farhan Al Saud dhe Këshilltari për Sigurinë Kombëtare, Mosaad bin Mohammad Al-Aiban (në qendër) iu bashkuan fillimit të takimit, por pritej të largoheshin herët nga diskutimet.
Top Channel
