“VLEN” po deshqiptarizon institucionet! Akuza e deputetëve të opozitës në Shkup për koalicionin në qeverinë
23/11 15:19
Skandali i mikrokredive ku dhjetëra mijëra qytetarë kanë parë që tu sekuestrohen pasuritë për kredi të shumave të vogla, nuk është mbyllur vetëm me rezolutën që maxhoranca miratoi në Parlament.
Një ditë më parë, përmes një letre të paprecedentë drejtuar kryetares së sapozgjedhur të Kuvendit, Elisa Spiropali dhe Komisionit të Ligjeve dhe atij të Ekonomisë, Presidenti Bajram Begaj kërkoi hetim për çka ndodhur në gjithë këto vite.
“Komisionet parlamentare kanë mundësi ligjore dhe institucionale të hetojnë rreth performancës së strukturave të brendshme institucionale, të cilat merren drejtpërdrejt me mbikëqyrjen e subjekteve të licencuara…”, shkruante ndër të tjera Begaj.
Lidhur me letrën e kreut të shtetit, 24 orë më vonë, ka ardhur edhe përgjigjja e Guvernatorit të Bankës së Shqipërisë, Gent Sejko, i cili teksa heq përgjegjësinë e institucionit që drejton lidhur me procesin e konfiskimit të pasurive të qytetarëve, kërkon që të bëhet kujdes ndaj keqinformimit, pasi mund të cënojë reputacionin e Bankës.
Presidenti Begaj në letrën e tij të gjatë drejtuar Kuvendit, thotë se qytetarët do të jenë të qetë kur institucionet të kenë gjetur zgjidhet e duhura. E në këtë pikë, në fund të letrës së tij Guvernatori Sejko shprehet se mbetet i hapur për kontributin e të gjitha palëve.
Presidenti Begaj: Përveç temës së vigjilencës institucionale, një temë e rëndësishme për performancën e BSH-së është dhe reagimi institucional. Ngjarje të papëlqyeshme, të pavarura nga vullneti i institucioneve mbikëqyrëse, mund të ndodhin, pavarësisht përpjekjeve për t’i parandaluar. E rëndësishme është se si institucionet reagojnë ndaj tyre. Komisionet parlamentare kanë mundësi ligjore dhe institucionale të hetojnë rreth performancës së strukturave të brendshme institucionale, të cilat merren drejtpërdrejt me mbikëqyrjen e subjekteve të licencuara, për të vlerësuar nëse janë ato instrumenti i duhur, nëse ato kanë kapacitetet apo resurset e duhura, nëse drejtohen me profesionalizëm dhe me kompetencë, etj. Ngjarjet që kanë ndodhur janë një motiv shumë i fortë për reflektim. Komisionet parlamentare lipset të ndihmojnë institucionin në këtë reflektim.
Guvernatori Sejko: Sot, miliona shqiptarë i kanë besuar sistemit bankar e financiar rreth 16 miliardë euro, sistem mbi të cilin Banka e Shqipërisë vigjilon pareshtur, ndaj çdo keqinformim mbi rolin dhe funksionet e Bankës së Shqipërisë rrezikon cenimin e reputacionit të këtij institucioni, i cili ka marrë kurdoherë vlerësime maksimale nga partnerët dhe institucione prestigjioze ndërkombëtare.
Presidenti Begaj: Ndjeshmëria publike ndaj abuzimit me administrimin e kredive me probleme është shumë e lartë dhe shqetësimi qytetar është legjitim. Çështja do të krijojë qetësi kur publiku të perceptojë se institucionet janë në sintoni të plotë me këtë shqetësim, kanë identifikuar dhe po punojnë për zgjidhjet e duhura. Qytetarët kanë nevojë të kuptojë se shteti dhe institucionet janë me ta dhe kundër abuzuesve.
Guvernatori Sejko: Ne mbetemi të hapur të japim të gjithë kontributin, informacionin, e sqarimet e nevojshme duke e konsideruar transparencën dhe llogaridhënien e plotë ndaj të gjitha palëve, e veçanërisht publikut, një element kyç të besueshmërisë së saj dhe tejet të rëndësishëm në përmbushjen e njërit prej mandateve të saj ligjore, atë të stabilitetit financiar të vendit.
Top Channel
