Akuzohet për spiunazh në favor të Rusisë dhe Iranit, arrestohet punonjësi i ambasadës amerikane në Oslo 22/11 22:38
Ministri i jashtëm i Egjiptit Sameh Shoukry dhe homologu i tij turk, Hakan Fidan, u takuan sot në Stamboll për bisedime në lidhje me konfliktin e rëndë në Gaza dhe zgjerimin e lidhjeve mes Turqisë e Egjiptit.
“Çdo gjë që ndodh në Palestinë mund të shkaktojë ‘tronditje sizmike’ globale, siç po shikojmë që po ndodh”, tha Fidan në konferencën e shtypit, teksa shtonte:
“Ajo që ndodh këtu prek Lindjen, Perëndimin, Veriun Jugun. Prandaj kriza më e madhe me të cilën përballet bota është hipokrizia e sistemit ndërkombëtar, të cilit i ka rënë makijazhi dhe e vërteta po zbulohet”.
“Sistemi ndërkombëtar i centralizuar që u vendos pas Luftës së Dytë Botërore, është një rend paligjshmërie e keqfunksionimi”, shtoi Fidan.
Homologu egjiptian Sameh Shoukry, mbështeti fjalët e turkut:
“Prej fillimit ne kishim paralajmëruar se Gaza do të shkaktonte një zgjerim të konfliktit dhe tani po shikojmë pasojat; goditjen e lundrimit të lirë në Detin e Kuq dhe tensionet ushtarake mes Iranit e Izraelit. U kërkojmë të dyja palëve të përmbahen nga konfrontimet ushtarake”.
Më shumë se 34 mijë palestinezë janë vrarë në fushatën e bombardimeve izraelite në Gaza dhe më shumë se gjysma e infrastrukturës civile të territorit është shkatërruar, nga sulmet për të cilat Izraeli thotë se janë në kundërpërgjigje të sulmit të 7 tetorit nga Hamas brenda Izraelit me rreth 1000 të vrarë.
Zhvillimi vjen teksa sot presidenti turk Rexhep Tajip Erdogan bisedoi për disa ore me kreun e Hamas në Stamboll, Ismail Haniyeh.
Zyra e presidentit tha se Erdogan kishte kërkuar “unitet dhe integritet mes palestinezëve”.
Top Channel
