Një ngjarje e rëndë u shënua mbrëmjen e sotme në qytetin e Korçës, me dy persona të vdekur.
Autori i ngjarjes, 61-vjeçari Ilo Lluka, ka qëlluar me armë zjarri Emiljano Pinen dhe më pas ka vrarë veten.
40-vjeçari ka humbur jetën rrugës për në spital, ndërsa trupi i pajetë i autorit u gjet në rrugë, pranë një hoteli.
“Më datë 28.02.2024, rreth orës 20:25, në lagjen nr. 18, Korçë, rruga “Koço Golniku”, një shtetas ende i paidentifikuar, dyshohet se ka qëlluar me armë zjarri shtetasin E. P., rreth 40 vjeç, banues në Korçë, i cili ka humbur jetën gjatë transportimit për në spitalin e Korçës. Autori i dyshuar i krimit, pasi ka qëlluar 40-vjeçarin, dyshohet se është vetëvrarë me armën e krimit”, thuhet në njoftimin e policisë.
Ende nuk dihet shkaku i ngjajres, ndërsa policia ka rrethuar të gjithë zonën. Trupi i autorit nga pamjet e siguruara nga Top Channel shihet se është ende në rrugë, i mbuluar nga një çarçaf i bardhë.
Uniformat blu kanë gjetur dhe sekuestruar në vendin e ngjarjes, lagja 18, armën e krimit dhe gëzhojat.
Top Channel
