Prokuroria e Durrësit ka përfunduar hetimet për ish-prokurorin Petrit Fusha, nën akuzë për deklarim të rremë të pasurisë, dhe çështja është dërguar për gjykim në Gjykatë.
“Në funksion të hetimeve të procedimit penal nr. 2733/2019, në ngarkim të të pandehurit P.F., rezulton se janë përfunduar hetimet lidhur me akuzën “Refuzimi për deklarimin, mosdeklarimi, fshehja ose deklarimi i rremë, i pasurive të personave të zgjedhur dhe nëpunësve publik, ose i çdo personi që ka detyrim ligjor për deklarim”, parashikuar nga neni 257/a, pgr. 2, i Kodit Penal dhe në datën 05.12.2023 çështja i është dërguar Gjykatës së Shkallës së Parë të Juridiksionit të Përgjithshëm Durrës për shqyrtim”- thuhet në njoftimin e akuzës durrsake.
Fusha ka qenë me detyrën e prokurorit dhe në bazë të ligjit iu nënshtrua procesit të rivlerisimit.
Nga Komisioni i Pavarur i Kualifikimit u dërgua në Prokurorinë pranë Gjykatës së Shkallës së Parë për Krime të Rënda Tiranë, raporti me rezultatin përfundimtar të hetimit administrativ për ish-prokurorin Petrit Fusha, ku u kërkua të hetohet për faktet në kuadër të rivlerësimit kalimtar. Ky fakt ka shërbyer për regjistrimin e çështjes penale, në ngarkim të tij dhe më pas ka sjellë marjen e tij në cilësinë e të pandehurit.
Prokuroria e Durrësit i nisi hetimet ndaj ish-prokurorit Petrit Fusha në korrik të vitit të kaluar. Ish-kreu i Prokurorisë së Tiranës që dha dorëheqjen nga sistemi i drejtësisë për të mos iu nënshtruar vettingut është vënë nën akuzë për deklarim të rremë pasurie.
Fusha është marrë në cilësinë e të pandehurit për veprën penale ”refuzimi për deklarimin, mosdeklarimi, fshehja ose deklarimi i rremë i pasurive, interesave private të personave të zgjedhur dhe nëpunësve publikë ose i ccdo personi tjetër që ka detyrimin ligjor për deklarim”, vepër kjo e parashikuar nga neni 257-a i Kodit Penal. Nëse fusha do të shpallet fajtor për deklarim të rremë të pasurisë ai rrezikon të dënohet me gjobë, ose me burgim deri në 3 vjet.
Pas dorëheqjes së tij nga detyra e prokurorit pranë Prokurorisë së Përgjithshme, më 28 shkurt të vitit 2019, procesi i rivlerësimit të Fushës është ndërprerë.
Top Channel
