Mijëra vajza u helmuan në shkollat e Iranit/ Udhëheqësi suprem Khamenei: Krim i pafalshëm

“Nëse ka njerëz të përfshirë në këtë çështje, dhe sigurisht që ka… autorët duhet të marrin dënimet më të rënda”, paralajmëroi ai.

Më shumë se 1000 vajza në dhjetëra shkolla janë prekur nga sëmundje të pashpjegueshme që nga nëntori. Incidente u raportuan në të paktën 15 qytete dhe qyteza vetëm të dielën.

Autoritetet kanë lëshuar shumë pak informacion në lidhje me hetimet e tyre dhe nuk kanë njoftuar për arrestime, por ata kanë akuzuar armiqtë e Iranit për helmime të dyshuara për të minuar strukturën klerikale.

Disa iranianë besojnë se shkollat ​​e vajzave janë duke u shënjestruar për t’i ndaluar ato të marrin arsim. Të tjerë sugjerojnë se autoritetet mund të jenë duke dënuar vajzat për rolin e tyre drejtues në protestat mbarëkombëtare antiqeveritare që shpërthyen në shtator.

Pamje të tmerrshme tregojnë dhjetëra vajza iraniane që nuk marrin dot frymë në një shkollë.

Studentët kanë thënë se kanë nuhatur mandarinë ose peshk të kalbur përpara se të sëmuren. Shumë prej tyre kanë vuajtur probleme me frymëmarrjen, të përziera, marramendje dhe lodhje.

Në komentet e tij të para publike për këtë çështje, Ajatollah Khamenei u bëri thirrje agjencive të zbatimit të ligjit dhe inteligjencës që “të ndjekin seriozisht çështjen”.

“Helmimet janë një krim i rëndë dhe i pafalshëm,” deklaroi ai gjatë një fjalimi në një ngjarje të mbjelljes së pemëve në Teheran, duke shtuar se nuk do të kishte falje nëse dikush identifikohej si autor dhe dënohej.

Shefi i gjyqësorit Gholamhossein Mohseni Ejei ndërkohë paralajmëroi se ata mund të përballen me akuzën e “korrupsionit në tokë”, e cila dënohet me vdekje.