![](https://top-channel.tv/wp-content/uploads/2024/09/MixCollage-07-Sep-2024-05-33-PM-5997-800x450.jpg)
Prezencë e gjerë sigurie shihej sot jashtë parlamentit të Pakistanit ku Imran Khan përballet me votën e rrezikshme nëse do të qëndrojë apo jo në post.
Kryeministri tha dje se pranonte vendimin e gjykatës së lartë që mund ta largojë nga pushteti, duke thënë se ishte viktimë e një konspiracioni të SHBA për “ndryshim regjimi”.
Kryeministri i zgjedhur në 2018 pritet të humbasë votën pas braktisjes së një anëtari të koalicionit dhe disa anëtarëve të partisë së tij.
Vendimi i gjykatës erdhi të enjten kur Khan shpërndau parlamentin dhe thirri zgjedhje të reja për arsye të “ndërhyrjeve të huaja”.
Në një fjalim 40-minutësh Khan denoncoi Lidhjen Muslimane të Pakistanit dhe Partinë Popullore që megjithse janë historikisht në konflikt, kësaj here u bashkuan për të larguar partinë e Khan.
Me humbjen e maxhorancës Khan akuzoi opozitën se po blente mbështetje në asemble me “pazare të hapura … duke tregtuar deputetët si dhi e dele”.
Ai tha se ato po bashkëpunonin me Uashingtonin për ta larguar nga posti prej kundërshtimeve të tij ndaj politikës së jashtme të SHBA, veçanërisht në vende si Irak e Afganistan.
Top Channel