Ministri i Brendshëm u shpreh se është miratuar një nga marrëveshjet që do të nënshkruhet të premten mes qeverisë shqiptare dhe asaj kosovare, sipas së cilës shtetasit nga Kosova do të marrin leje qëndrimi me afat 5-vjeçar me një aplikim dhe pa dokumente.
Kjo marrëveshje do të sjellë lehtësim të procedurave të lejeve të qëndrimit për qytetarët në të dyja vendet, ku do të kenë brenda dhe lejen e punës dhe njohja e sigurimeve shoqërore të qytetarëve si të Shqipërisë dhe Kosovës në vendet respektive.
“Sot miratuam një nga marrëveshjet që do nënshkruajmë ditën e premte, në mbledhjen midis qeverisë të Kosovës dhe Shqipërisë, që ka të bëjë me lejet e qëndrimit të shtetasve respektivë, është një lajm i mirë për shtetasit e Kosovës, që do të marrin thjesht me një aplikim dhe pa dokumente menjëherë lejen e qëndrimit për 5 vite në Shqipëri, brenda do të jetë edhe leja e punës. Është lajm i mirë edhe për shqiptarët që jetojnë në Kosovë që do të marrin leje qëndrimi në Kosovë për të qëndruar atje me procedura më të lehtësuar që janë sot. Është në vazhdën e disa marrëveshjeve që do të nënshkruajmë brenda sektorëve që përfshin Ministria e Brendshme”, u shpreh Çuçi.
“Besoj se është bërë shumë e qartë, e thënë qartazi, që nuk do të ketë kampe refugjatësh për interesa të vendeve të tjera në Shqipëri!”
Kjo ishte përgjigjja e prerë e ministrit të Brendshëm, Bledi Çuçi, në një komunikim me mediat pas mbledhjes së qeverisë. Duke iu përgjigjur interesimit të gazetarëve për këtë çështje që ka qarkulluar së fundi në mediat britanike dhe ato vendase, Çuçi shpjegoi se edhe në rastet kur emigrantët kalojnë tranzit, nuk do të qëndrojnë në Shqipëri.
“Kjo është thënë qartë nga Kryeministri, është thënë qartë nga Ministrja e Jashtme, është thënë qartë nga Ministri i Drejtësisë, është thënë qartë edhe nga Ministri i Brendshëm. Në lidhje me atë përcaktim që ju i referoheni, ajo është e kundërta madje! Ai është një përcaktim që edhe kur kalojnë tranzit, nuk do qëndrojnë në Shqipëri, por janë të detyruar vendet e origjinës, që të përgjigjen për ata emigrantë apo azilkërkues. Pra është e kundërta e asaj që thuhet në media”, tha ministri Çuçi.
Top Channel
