Vladimir Pistalo pret Bardhylin: Libri duhet të na bashkojë

Krijimi i një programi të përbashkët përkthimi për të botuar në gjuhën serbe dhe anasjelltas i autorëve të të dy vendeve; promovimi i vlerave më të mira në fushën e librit; shkëmbimi i eksperiencës në rrjetin e librarive dhe bibliotekave si dhe pjesëmarrja e botuesve shqiptarë në Panairin e Librit në tetor në Beograd, ishin disa nga tematikat e tjera që u diskutuan.

Midis të tjerave dy bashkëbiseduesit diskutuan dhe ranë dakord, për pjesëmarrjen si të ftuar, i dy autorëve të rinj shqiptar në Festën e Librit në Novi Sad në vitin 2022.

“‘Atë që ndan politika e bashkon kultura’, thotë Gëte, edhe çdo projekt politik pa kulturën si element i qenësishëm i tij do të ishte i mangët, tha Bardhyli”.

Sipas saj, “Për arsye historike tanimë të njohura për ne të gjithë, regjimeve diktatoriale dhe mbylljes hermetike, mes serbëve e shqiptarëve ka një hendek të madh mosnjohjeje, mungese informacioni, apo edhe mungesë shkëmbimesh vlerash në kulturë e letërsi etj. Kjo hipotekë e rëndë për të dy popujt tanë vjen e bëhet edhe më e dëmshme kur kemi parasysh paragjykimet e mëdha që kanë ekzistuar mes nesh për arsye nga më të ndryshmet: politike, historike, kulturore etj. Vetëm kultura dhe arti do ta shkurtojnë e zhdukin këtë hendek; vetëm arti e kultura janë ambasadorët më të mirë për t’u njohur mes nesh dhe çmuar vlerat e ndërsjella të krijuara në shekuj dhe që vijojnë të krijohen edhe sot prej shkrimtarëve, artistëve të skenës e të ekranit, piktorëve e skulptorëve, por edhe muzikantëve, etj”.

Z. Pistalo u shpreh se, “kultura duhet të jetë në qendër të ‘Open Balkan’ dhe çdo komunikim kulturor nis nga libri”.

Sipas Bardhylit ky afrimi kulturor do të thotë që më shumë shkrimtarë shqiptarë, serbë, maqedonë, malazez, boshnjakë të botohen e të qarkullojnë në libraritë e vendeve tona.

“Plot 30 vjetë pas rënies së Murit të Berlinit dhe të Perdes së Hekurt mes Perëndimit dhe Lindjes një mur i vogël dhe një tjetër Perde, edhe pse jo prej Hekuri, vijon të ekzistojë mes vendeve tona ballkanike. Arti dhe kultura, në radhë të parë letërsia e shkrimtarët, janë instrumenti më i mirë për të shembur një herë e përgjithmonë rrënojat e së kaluarës dhe për t’i ndihur integrimit mes nesh dhe atij në familjen e madhe europiane”, tha Pistalo.

Gjatë vizitës në Beograd drejtorja e QKLL-së është pritur dhe nga Drejtori i Bibliotekës Universitare të Beogradit prof Aleksandar Jerkov ku është folur mbi mundësinë e një ekspozite të fondit të librit shqip të kësaj librarie.

Top Channel