![](https://top-channel.tv/wp-content/uploads/2024/09/0-2024-09-07T190138.257-800x450.jpg)
Mbetjet hidrokarbure që dalin nga procesi i dekantimit të naftës bruto në depozitat në Qafën e Kashit në Mallakastër, shkaktojnë ndotje të madhe të ajrit, tokës dhe nëntokës.
Nëpërmjet përrenjve të rastësishëm, këto mbetje derdhen në rezervuarin e Marushës, i cili prej më shumë se 20 vitesh nuk është pastruar.
Përrenjtë me mbetje hidrokarbure ndodhen shumë pranë tubacioneve të ujësjellësit nga ku furnizohet me ujë të pijshëm i gjithë qyteti i Ballshit. Ndërkohë ndotja mjedisore që krijohet është shqetësuese për të gjithë zonën, e sidomos banorët e fshatit Kash.
Shpërndarja në natyrë e mbetjeve hidrokarbure, ështe gjithashtu një rrezik i përhershëm për përhapjen e zjarreve në depozitat e naftës. Katër muaj më parë një 50 vjeçar humbi jetën si pasojë e zjarrit që ra në stacionin e pompimit.
Depozitat e Kashit kryejnë pjesën më të madhe të dekantimit të naftës bruto në zonën e Mallakastrës.
Uji teknologjik që del nga procesi i dekantimit të naftës bruto, pasi përshkon tokat bujqësore në një gjatësi më shumë se 10 km, derdhet në lumin Vjosë, i specifikuar si lumi i vetëm i egër në Europe, e më pas në detin Adriatik.
Top Channel