“Ishin treshe, tani do futen dyshe”/ Gjoni nuk kursehet ndaj Murrizit dhe Ballës: Shqipëria nuk bëhet me lëpirjen ndaj ambasadorëve

Me tone ironie, Gjoni tha se kampionë janë partitë që rrotullohen në krevat dyshe, ndërsa më parë ishin treshe. Sipas tij, futja në parlament e deputetëve të tjerë pas djegies së mandateve të opozitës, “prishi përkohësisht krevatin e tyre.”

Gjoni: Myslym, ata që do vijnë thjesht po rregullojnë krevatin, ishin treshe tani do futen dyshe. Futja jonë në parlament e prishi krevatin e tyre përkohësisht. Kaq qesharak është bërë ky proces si kampionët e drejtësisë sa këta që do të hyjnë në shtator do të jenë kampionët e integrimit që ta dinë të gjithë shqiptarët që të vazhdojnë të shpresojnë se kjo punë zgjidhet me kampionë ku partitë rrotullohen dyshe, jo më treshe.

Më parë, Murrizi i tha Gjonit se në shtator Kuvendi do të bëhet laborator shkencor, do të vijë ajka që do të shpikë vaksinën e do shkojnë në NASA.

Murrizi: Ralf, kemi dhe një seancë, më 1 korrik, pastaj do të shpëtojnë shqiptarët nga ne, se këtu o z.Manja këtu do të jetë laborator shkencor, do të vijnë ajka, do të shpikin vaksinën, ata që do të shkojnë drejt NASA-s. Këtu do të ketë hajdut doganash, armësh, kontrabandistë. Ju faleminderit.

Ndërsa ndaj Taulant Ballës, i cili tha se kanë plotësuar pritshmëritë e familjes europiane për integrimin e Shqipërisë në BE, Gjoni u shpreh se Shqipëria bëhet vetëm me respektin ndaj vetes, jo me “lëpirjen” ndaj ambasadorëve.

Gjoni: Taulant, nuk rri dot pa përmendur shprehjen “familje evropiane”. Duhet të shohim veten në pasqyrë se kjo nuk është më familje, por klub hipokrit qe po tallet me të ardhmen e popujve të Ballkanit. Është i turpshëm vendimi për të penguar hapjen e negociatave dhe nuk duhet toleruar nga ana jonë. Nuk duhet të përqendrohemi tek Twitter-at e ambasadorëve.

Shqipëria do të bëhet kur të respektojmë veten më shumë se t’i lëpihemi ambasadorëve.

Top Channel