Pandemia ndikoi direkt në uljen e numrit të lindjeve në Shqipëri.

Të dhënat e Instat tregojnë se vitin e kaluar numri i lindjeve arriti në 28 075 foshnje, apo rreth 486 lindje më pak se në vitin 2019.

Vitin e kaluar, vetëm tre qarqe të vendit shënuan rritje të lindjeve, teksa e gjithë pjesa tjetër pësoi rënie, ku më shqetësues ky fenomen paraqitet në qarkun e Gjirokastrës me vetëm 504 lindje gjatë 2020.

Për ekspertin e çështjeve sociale Kosta Bajraba kjo mund të lidhet me pasiguritë dhe të ardhurat e pakta të çifteve të reja. Kjo rënie drastike e lindjeve është shqetësuese shton ai dhe duhet adresuar me politika afatgjata.

“Lindjet janë ulur me rreth 500-600 lindje në vit. Janë bërë përpjekje për të inkurajuar rritjen e tyre edhe përmes politikave si bonuset, por që nuk e zgjidhin problemin. Mendoj se duhen politika më të qëndrueshme të reja për çiftet e reja, si të krijojmë mundësi shkollimi, punësimi për çiftet e reja. T’u krijojmë mundësi lehtësi strehimi apo kreditimi. Janë zgjidhje më afatgjata”,  Bajraba.

Që prej vitit 1990 Shqipëria ka parë një tkurrje të fortë të lindshmërisë, ku në atë kohë numëroheshin 82 mijë foshnja. Ndërsa gjatë periudhës midis dy censuseve 2001 – 2011 numri i tyre ka pësuar rënie të vazhdueshme nga rreth 53 mijë në 2001 në 34 mijë në vitin 2011.

Sipas projeksioneve të Instat, në skenarin më negativ që parashikon një tkurrje të mëtejshme të lindshmërisë dhe rritje të numrit të vdekjeve, pritet që Shqipëria në vitin 2031 të ketë një shtesë natyrore në -6.2 mijë persona.

Top Channel