Elon Musk prezanton ‘ushtrinë’ e robotëve humanoidë Optimus, për të ardhmen dramatike të prezantuar më parë në filma (fotot)
11/10 15:31
Një afro-amerikan ka vdekur në shtetin e New York pasi i ngalua me anë të “kapuçit të pështymës” dhe u mbajt me fytyrë në tokë për më shumë se dy minuta, është zbuluar së fundmi nga hetimi i kamerave trupore të oficerëve.
41 vjeçari Daniel Prude, i cili kishte probleme mendore dhe nuk ishte i armatosur, u ndalua nga policia në mars dhe atij iu vu në kokë mjeti i ri “kapuçi i pështymës”, që përdoret për të ndaluar që të arrestuarit të pështyjnë apo të kafshojnë.
Ai vdiq nga asfiksia ne incidentin e marsit, por çështja është bërë publike vetëm së fundmi.
Ngjarja ka ndodhur dy muaj para vrasjes së George Floyd.
Floyd vdiq kur një polic i bardhë i mëshonte me gju prapa qafës për rreth tetë minuta gjatë ndalimit në Minnesota, ngjarje e cila solli protesta të gjera në SHBA dhe në botë kundër racizmit.
Sot në një konferencë shtypi vëllai i Prude, Joe tha se kishte qenë ai që thirri policinë më 23 mars kur i vëllai po tregonte shenja të rënda të sëmundjeve mendore.
“Telefonova që vëllai im të merrte ndihmë, jo që të mbytej”, thotë ai.
Punonjësi i fabrikës nga Chicago dhe baba i pesë fëmijëve, Daniel Prude po vizitonte të vëllanë në kohën e vdekjes.
Në pamjet e rënda të kamerave trupore të policisë që u bënë publike me kërkesë të familjarëve, Prude shihet duke vrapuar i zhveshur teksa binte një dëborë e lehtë. Pas ardhjes së policisë ai shihet i shtrirë përtokë duke u arrestuar.
Në video shihet që Prude bashkëpunon menjëherë duke zbatuar urdhrat e oficerëve duke thënë: “Sigurisht, sigurisht.”
Më pas ai bëhet i irrituar, nganjëherë duke pështyrë ndaj oficerëve por nuk tregon rezistencë fizike.
Kur ai pushon së lëvizuri, një nga oficerët dëgjohet që thotë: “Qenka ftohur fare.”
Mjekët që vijnë në skenë përpiqen të rikthejnë në ndërgjegjie, por u shpall i vdekur më 30 mars.
Në një ekzaminim zyrtar të publikuar nga gazetat vendore Democrat e Chronicle vdekja e Prude klasifikohet si vrasje e shkaktuar nga “komplikacionet e asfiksisë në kushtet e kufizimit fizik”.
Top Channel
