Të enjten në mesditë sheshi i Teatrit Kombëtar pati sërish vëmendje. Kjo sepse një pjesë e sendeve brenda godinës u zhvendosën.
Brenda godinë së kyçur prej kohësh nuk lejohet media dhe artistët.
Vazhdimisht zërat për një urdhër të mundshëm për zhvendosje janë mohuar nga punonjësit e atyshëm. Por në fakt nëpër korridore thuhet se një urdhër ka ardhur për zhvendosjen e sendeve, duke i lënë këto godina bosh për hapin e radhës, që është deklaruar që është shembja.
“Dje në mëngjes kanë filluar çmontimin e pajisjeve të rënda të Teatrit Kombëtar për ta bërë gati për ta shembur. Qëndruam deri në orën 06:00 të mëngjesit, e më pas kanë qëndruar njerëz të tjerë”, tha Robert Budina.
Aleanca për Mbrojtjen e Teatrit sëbashku me opozitën kanë qendruar natën e së enjten duke u gdhirë e premte në këtë shesh të vogël, ku prej më shumë se një viti kryejnë një protestë qëndrese kundër shembjes.
“Ne do të qëndrojmë për një arsye shumë të thjeshtë. Kemi 1 vit e gjysmë që rrimë këtu pa asnjë lloj interesi. Këtë kohë të investuar këtu nuk mund t’ia falim pushtetit sepse nëse do të bëjmë këtë do të humbim shpresën e njerëzve se edhe kur reziston kaq gjatë nuk fiton”, tha Robert Budina, Aleanca për Mbrojtjen e Teatrit.
Ministria e Kulturës e mohon ekzistencën e një urdhri.
Ajo që shohim sot është që një fugon i teatrit po transporton rekuizitën, një proces i zakonshëm ky në çdo fund sezoni.
Aleanca dhe protestuesit mendojnë se kjo po kthehet në një lojë nervash, me provokime të herëpashershme.
Kujtojmë se më herët janë hequr edhe gërmat; Teatri Kombëtar. Të cilat u rivunë nga protestuesit për mbrojtjen e godinës.
Ndërkohë askush nuk i mori përgjegjësitë për këtë veprim.
Top Channel
