Zyrtarizimi i Marco Rubio si sekretar i Shtetit, reagon ministri Igli Hasani: Mirëpresim të forcojmë lidhjet e forta mes SHBA dhe Shqipërisë 13/11 23:08
13 janari 2018 dukej një ditë brenda rutinës në qytetin e Shkodrës.
Deri në çastin kur në afërsi të tregut shfaqet me makinën e blinduar Lulzim Kulla, një nga personazhet sfidues jo vetëm për kundërshtarët, por edhe për policinë. Në këtë çast, qetësia zëvendësohet me pamje lufte. Kamera e sigurisë që Top Channel disponon tregon se pasi ai ka parkuar pranë biznesit, menjëherë ndodh një shpërthim i fuqishëm dhe mes tymit, brenda pak sekondash, të plagosurit dhe kalimtarët e rastit përpiqen të largohen nga vatra e rrezikut.
Të rinjtë nga Elbasani, Argent Lulaj, Serxho Teta dhe Endri Copja konsiderohen nga prokuroria si autorët e atentatit që kishte në shënjestër Lulzim Kullën. Në përfundim të hetimeve, prokuroria i dërgoi ata të pandehur në gjykatë për veprën “vrasje në rrethana cilësuese në mënyrë të rrezikshme”, pasi, sipas prokurorisë, ata rrezikuan dhe plagosën edhe 7 persona të tjerë.
Në dosjen e dërguar për gjykim me tre të dyshuarit, që të 3 mohues për atentatin e telekomanduar, prokuroria përmend se eksplozivi ishte vendosur në një motoçikletë, që ishte transportuar më herët me një makinë me targat AA 801. Por, ky mjet shfaqet në kamera bashkë me një automjet tjetër që pas verifikimeve në sistemin e gjobave, kanë nxjerrë në dritë përdoruesit e tyre.
Siç pretendon prokuroria, automjeti është gjobitur pak ditë para atentatit dhe si shofer kishte 30-vjeçarin Copja. Ai, shpjegojnë prokurorët, në vazhdim rezulton me rekorde kriminale në qytetin e Elbasanit duke nënkuptuar se atentati ndaj të fortit të Shkodrës mund të jetë nënkontraktuar nga kundërshtarët e tij tek një grup aleat në Elbasan. Edhe mjeti tjetër që shfaqet në kamera në Shkodër ditën e ngjarjes i përket të dyshuarit tjetër Argel Lulaj.
Por, të dyshuarit mbajnë qëndrim mohues duke deklaruar se gjendeshin në Shkodër pasi kishin blerë 20 kilogramë hashash nga një person me emrin Toni, të cilit nuk ia kujtojnë më as mbiemrin dhe as numrin e telefonit.
Atentati ndaj Lulzim Kullës u hetua edhe nga Prokuroria e Krimeve të Rënda si akt terrorist, pasi aty pranë ishin edhe disa shoqata të huaja të cilat u ankuan për pasigurinë. Prokuroria pretendon se tashmë e ka zbardhur gjithë mekanizmin, megjithëse ende nuk ka përcaktuar saktë se sa ishte sasia e lëndës plasëse që shkatërroi disa biznese e plagosi 8 vetë.
Top Channel
