Të mbrohesh nga shantazhimet; Rreziku që kërcënon të miturit në rrjetin e internet

Alarmet për vemendje ndaj aktivitetit të fëmijëve qoftë në rrjete sociale, qoftë në jetën reale, bien çdo ditë që kur këto të dyja janë të lidhura me njëra-tjetrën. Në Ditën Botërore të Internetit të Sigurtë janë vetë fëmijët që me trajnimin e UNICEF-it janë kthyer në këshilluesit e vegjël të situatave të dhunshme dhe të dëmshme “online”.

Edhe historia e Jonit, nxënësit nga Fieri, tregon abuzimin dhe shfrytëzimin seksual të fëmijëve në internet. Dikush ju ofrua “online” me një vlerë monetare që ai të kryente disa foto intime. I frikësuar lajmëroi prindërit për situatën ku ndodhej. Prindërit kuptuan që djali kishte rënë pre’ e një rrjeti pedofilie. Për fat të mirë situata u kap në kohë, por jo gjithmonë mund të ndodhë kështu.

Ndër të tjera, është hartuar manuali “Këshilluesit e vegjël për sigurinë online” që do të mbërrijë në bankat e çdo nxënësi për të mësuar mbi problemet që mund të hasin gjatë lundrimit në internet dhe si t’i përballojnë ato.

“Shumë bashkëmoshatarë të mitë u kanë ndodhur raste të tilla dhe kanë pasur frikë e nuk ua kanë treguar prindërve ose mësueseve dhe e kanë vuajtur personalisht”, thonë nxënësit.

“Do u thoja të gjithë bashkëmoshatarëve të mi që të ruhen, pasi është vërtet shumë e rrezikshme sepse ato janë fotot e tua personale dhe nuk ke pse i ndan me të tjerët, aq më tepër në rrjetet sociale që janë të rrezikshme për fëmijët”, tregon një tjetër.

Por mbështetja e prindërve dhe mësuesve që fëmijët të jenë të sigurtë në internet nuk duhet të mungojë asnjëherë.

“Në pozicionin e një nëne, e një prindi, e një mësueseje mendoj se fëmijët duhet të kenë shumë ndihmën e prindërve, këshillimin dhe kontrollin e tyre. Mund të them që prindërit janë më pak të informuar sesa fëmijët e tyre”, thotë mësuesja.

Top Channel