![](https://top-channel.tv/wp-content/uploads/2024/09/MixCollage-07-Sep-2024-05-33-PM-5997-800x450.jpg)
Prokurorët në Gjermani kanë deklaruar se kanë prova se një ish-infermier ka vrarë të paktën 100 persona në dy spitale ku kishte punuar.
Hetuesit besojnë se Niels Hoegel, që aktualisht po shlyen një burgim të përjetshëm për dy vrasje, u ka administruar sistematikisht doza fatale të sëmurëve nën kujdesin e tij.
Akuzat e reja, të bazuara në analizat toksikologjike, pritet të ngrihen vitin e ardhshëm. Hoegel thuhet se ka vrarë 38 pacientë në Oldenburg dhe 62 të tjerë në Delmenhorst, dy lokalitete në veri të Gjermanisë, mes viteve 1999-2005.
Sipas burimeve, ai donte të befasonte kolegët dhe pasi u administronte dozat fatale pacientëve përpiqej t’i sillte sërish në jetë, por shumica e tyre vdisnin.
Prokurorët dyshojnë se Hoegel mund të ketë vrarë edhe më shumë, por një pjesë e trupave të atyre që mund të kenë qenë viktima janë kremtuar.
Nëse shpallet fajtor për të gjitha vdekjet, ai do të rezultojë vrasësi serial më i keq që pas Luftës së Dytë Botërore.
Hetimet ndaj Hoegel u zgjeruan kur ai pranoi se kishte vrarë të paktën 30 persona, gjatë procesit gjyqësor të vitit 2015, kur u dënua për dy vrasje, dy tentativa vrasjeje dhe dëmtim të pacientëve.
Hetuesit zhvarrosën 130 vetë për të kërkuar gjurmë të mjekimit që mund të kishte çuar në bllokimin e sistemit kardiovaskular të tyre.
Top Channel