SHBA, senatori republikan dyshon te kompetencat e Trumpit

Presidenti i Shteteve të Bashkuara, Donald Trump pati planifkuar më herët që ta emërojë Corker në pozitën e Sekretarit të Shtetit.

Nëse presidenti Trump nuk bën “ndryshime radikale”, ai mund ta dërgojë kombin “në një rrezik të madh”, ka thënë senatori Corker.

Ai i ka bërë këto komente pasi presidenti Trump reagoi me një varg postimesh në “Twitter” për deklaratat e tij të mëparshme rreth dënimit të dhunës dhe racizmit në protestat në Virxhinia, e duke propozuar se ekzekutimi brutal i islamikëve është mënyra më e mirë për t’i penguar këto sulme, pas njoftimit për sulmin terrorist në Barcelonë, në të cilin humbën jetën 13 persona.

“Duhet të bëhen disa ndryshime radikale”, ka thënë Corker në Tennesse.

“Presidenti nuk ka mundur të demonstrojë stabilitet dhe as kompetencat që duhet të demonstrojë për të qenë i suksesshëm. Ne kemi nevojë që presidenti të jetë i suksesshëm, vendi ynë ka nevojë. Nuk ka rëndësi nëse je republikan apo demokrat, ne dhe bota kemi nevojë që presidenti ynë të jetë i suksesshëm”, tha Bob Corker, senator republikan.

Vënia në pikëpyetje e kompetencave të presidentit nga ana e senatorit Corker është sinjali më i fundit se republikanët po i kthejnë shpinën në publik Trumpit dhe sinjalizon një betejë, që vet Trump e ka ndezur me anëtarë të partisë së tij.

Rrallëherë, për të mos thënë asnjëherë, një president republikan ka pasur marrëdhënie kaq të tensionuara me senatorët republikanë. E postimet e Trump në “Twitter”, të enjten, tregojnë se presidenti nuk ka ndërmend të ndryshojë taktikë.

E ndërsa disa në parti, përfshirë kreun e shumicës në Senat, Mitch McConnell, kanë evituar kritikat e drejtpërdrejta për presidentin, senatorë të tjerë e kanë shfrytëzuar dhunën në Charlottesville për të thënë hapur atë që mendonin.

Top Channel