Viti 2017 nuk duket një vit edhe aq pozitiv për Ballkanin, që po e humbet qetësinë e rrezikon t’i hyjë një spiraleje në rënie.
Në një intervistë për “Koha ditore”, kreu i diplomacisë shqiptare, Ditmir Bushati, edhe një herë i referohet nevojës për vëmendje nga Bashkimi Europian.
“BE-ja duhet të eksportojë më shumë stabilitet për të frenuar paqëndrueshmërinë që vjen nga Ballkani Perëndimor”, shprehet ai.
Ministri i Jashtëm analizon situatën e përgjithshme, duke nisur nga kriza e zgjatur në Maqedoni, rezultat sipas tij i dështimit në implementimin e rregullave të demokracisë, si dhe funksionimit të dobët të institucioneve.
Ngërçin në Malin e Zi, e sheh si pasojë e përplasjeve mes vizionit euroatlantik dhe forcave që tentojnë ta vendosin këtë shtet, nën ndikimin e aktorëve që e shohin NATO-n si kërcënim. Në Bosnje, gjendja është më e ndërlikuar, duke qenë se platforma e “Dayton”-it, e cila e shpëtoi vendin nga gjakderdhja, nuk shihet aktualisht si platformë shtetformuese.
Rinia në Serbi po ngrihet kundër dominimit të fuqishëm të presidentit të zgjedhur Vuçiç. Pas kësaj, vjen te Kosova dhe Shqipëria.
“Sa i takon Kosovës, shpresoj shumë që zgjedhjet e parakohshme të ndihmojnë në gjetjen e një zgjidhjeje për të gjitha çështjet delikate, që kanë pritur prej kohësh një rrugëdalje të guximshme. Lidhur me situatën në Shqipëri, në zemër të krizës qëndron frika se çfarë do të ndodhë me miratimin e Reformës në Drejtësi, një proces, pasojat e të cilit do të prekin edhe pjesë të tjera të jetës publike”, tha Bushati.
Pikërisht “stress-test”-i i Drejtësisë është për të prova e madhe, që duhet të kalojne të gjithë e që po shkakton rezistencë. I pyetur mbi rolin e Rusisë në rajon, ministri i Jashtëm u shpreh se, në thelb preferohet një marrëdhënie normale me Rusinë dhe eksplorimi i zonave të përbashkëta të interesit, por ka plot gjëra, mbi të cilat Tirana zyrtare nuk është dakord me të, duke kujtuar sesi Moska nuk humbet asnjë rast për t’i lidhur vështirësitë e vendeve të rajonit, me atë që e konsideron “përzierje të bllokut europian në çështjet e tyre të brendshme”.
Top Channel
