Përfaqësues të Bordit të Drejtorëve të Bankës Evropiane për Rindërtim dhe Zhvillim ndodhen në Tiranë, ku po zhvillojnë takime me autoritetet e vendit.
Gjatë takimit me guvenatorin e Bankës së Shqipërisë, Gent Sejko, ata nënvizuan faktin se trajtimi i sfidave kryesore me të cilat përballet ekonomia shqiptare, si ruajtja e stabilitetit politik dhe vazhdimi e thellimi i mëtejshëm i reformave strukturore, mbeten të një rëndësie të veçantë për të përmirësuar klimën e biznesit dhe për të thithur sa më shumë investime të huaja.
Ndërsa guvernatori Sejko i njohu zyrtarët e BERZH me zhvillimet më të fundit ekonomike dhe financiare në vend dhe theksoi se rritja ekonomike e vendit është në një trajektore pozitive.
Disa nga çështjet më të rëndësishme që u diskutuan në këtë takim ishin nxitja e kreditimit, reduktimi i kredive me probleme si dhe nisma më e fundit në drejtim të uljes së vartësisë nga euro të ekonomisë sonë.
Nga ana e tyre, përfaqësuesit e Bordit të Drejtorëve shprehën angazhimin për të vazhduar kontributin e BERZH lidhur me projekte të rëndësisë së veçantë në fusha si: stabiliteti financiar, agrobiznesi, energjia, etj.
Top Channel
