Gjermani, Berlini drejt ndëshkimit të Merkelit. Kryebashkiaku: “AfD”, rilindje e nazizmit

Sondazhet tregojnë edhe njëherë një rritje të madhe të partisë së krahut të djathtë, “Alternativa për Gjermaninë”, e cila ka bërë fushatë të bazuar kryesisht mbi çështjen e emigracionit, me synimin për të përfituar nga një reagim popullor kundër Kancelares Angela Merkel, për shkak të politikës së saj të dyerve të hapura ndaj refugjatëve. Një politikë që solli vitin e kaluar në Gjermani mbi një milion refugjatë azilkërkues.

Sipas parashikimeve, socialdemokratët (SPD) e udhëhequr nga kryebashkiaku i Berlinit, Michael Muller, do të mbesin sërish si partia më e madhe në Asamblenë rajonale, me rreth 24 për qind të mbështetjes. Ka qenë pikërisht SPD-ja që ka qeverisur në kryeqytet përgjatë 5 viteve të kaluara, sigurisht në koalicion me kristiandemokratët e Merkelit (CDU), por kësaj radhe pritet që të nevojitet formimi i një koalicioni tripartiak, mes SPD-së, “Të gjelbërve” dhe partisë së majtë.

Lëkundja e pritshme e CDU-së pritet ta përfshijë partinë e Merkelit në një garë të ashpër për vendin e dytë me “Të gjelbrit”, teksa të dyja këto grupe pritet të sigurojnë rreth 18 për qind të votave. “AfD”-ja vërtitet aktualisht rreth 14 përqindëshit, një rezultat që do t’i lejonte partisë antiemigracion të futet në asamblenë e 10 rajonale, nga 16 të tilla që janë nëpër shtetet gjermane.

Kryebashkiaku i Berlinit, Muller paralajmëroi votuesit që të mos japin mbështetjen e tyre ndaj “AfD”-së gjatë kësaj të diele, pasi një mbështetje në përqindje dyshifrore ndaj ekstremistëve do të ndryshonte panoramën politike të kryeqytetit gjerman, e që do të konsiderohej anembanë botës si një rilindje e nazizmit.

Në Berlin janë hapur 1.800 qendra votimi, të cilat pritet të mbyllen në orën 18 të pasdites, ndërsa rezultatet e para të “exit poll”-eve priten menjëherë pas përfundimit të votimit.

Top Channel