Refugjatët, Tusk: Prioriteti i BE-së, plan-veprimi i përbashkët me Turqinë

19/02/2016 10:40

Në fillim të marsit Bashkimi Europian do të mbajë një samit të posaçëm me Turqinë mbi krizën e emigracionit. “Plan-veprimi BE-Turqi është sot prioriteti ynë kryesor”, deklaroi Presidenti i Këshillit Europian Donald Tusk në fundin e bisedimeve të zgjatura deri në orët e vona të mbrëmjes së djeshme në Bruksel.

Blloku është zotuar t’i japë Ankarasë 3 miliardë euro ndihma në këmbim të strehimit të refugjatëve në territorin e saj. Sistemi i rishpërndarjes në bazë të kuotave me qëllim lehtësimin e presionit në vendet e vijës së frontit siç është Italia dhe Greqia, është provuar jo efikas për shkak të refuzimit të disa shteteve të Europës lindore për implementimin e planit të BE-së.

“Bashkëpunimi me Turqinë është prioritar dhe ne duhet të bëjmë ç’është e mundur për t’ia dalë mbanë. Kjo është arsyeja përse vendosëm organizimin e një takimi special me Turqinë në fillim të muajit të ardhshëm”, tha Tusk.

Fjalët e Tuskut i përforcoi dhe kreu i Komisionit Europian Jean-Claude Juncker, i cili tha se bashkëveprimi me Ankaranë është i një rëndësie kyçe në menaxhimin e valës së emigrantëve që e kanë zhytur në krizë të thellë bllokun 28-anëtarësh. E konfirmuam që të gjithë se nuk ka asnjë alternativë tjetër më të mirë, më të zgjuar e më të urtë sesa bashkëpunimi me Turqinë, u shpreh ai.

Tusk do të zhvillojë tani një sërë takimesh bilaterale me liderë të BE-së për ta diskutuar çështjen më tej.

Top Channel